Գերմանական կաթոլիկ եկեղեցին եկեղեցու հարկը չվճարողներին կհեռացնի եկեղեցուց , հայտարարվում է գերմանական եպիսկոպոսների կայքում: Փաստաթղթում նկարագրվում են չվճարողների նկատմամբ կիրառվելիք պատժամիջոցները: Մասնավորապես, նրանք չեն կարող լինել կնքահայր կամ կնքամայր, մտնել եկեղեցական հասարակական միության մեջ, չեն կարող նաև մեղքերի թողություն ստանալ:
Պսակադրության մասին կարող են պայմանավորվել քահանայի հետ, եթե պսակադրվողները կխոստանան «պահպանել հավատքը և երեխաներին դաստիարակել կաթոլիկ հավատքով»: Բացի դրանից, եթե մարդը եկեղեցուց հրաժարվել է և մինչև կյանքի վերջը չի զղջացել, նրա հարազատներին կմերժեն նրա եկեղեցական հուղարկավորությունը: Ամբողջությամբ դա համապատասխանում է եկեղեցուց հրաժարվելուն, չնայած գերմանացի եպիսկոպոսներն այդ բառը իրենց հրամանագրում չեն նշում, փոխանցում է Die Welt:
Ենթադրվում է, որ քահանաները պետք է փորձեն վերադարձնել եկեղեցուց հեռացածներին: Երբ կաթոլիկը գալիս է ԶԱԳՍ, տեղեկացնելու, որ հեռանում է եկեղեցուց, քահանան պետք է հրավիրի նրան բացատրական զրույցի, որպեսզի հնարավորության դեպքում վերադարձնի նրան եկեղեցի:
Այս փաստաթուղթը ուժ կստանա սեպտեմբերի 24-ին: Այն պատրաստել են գերմանական հոգևորականները, իսկ Վատիկանը հաստատել է դեռ օգոստոսի վերջերին: Հրամանագիրը կգործի միայն Գերմանիայում:
Այս ձևով գերմանական կաթոլիկ եկեղեցին պատասխանել է այն նախատիպին, որը ստեղծվել էր 2007 թվականին պրոֆեսոր Հարտմուտ Ցապպի կողմից , ով փաստացի դուրս էր եկել եկեղեցուց, սակայն հայտարարում էր, որ իրեն համարում է կաթոլիկ եկեղեցու անդամ: Նա հիմնվում էր Վատիկանի կողմից հաստատված օրենքների վրա, ըստ որի՝ մարդը կարող է իրեն չհամարել եկեղեցու անդամ, սակայն օգտվել եկեղեցիական ծիսակատարություններից:
Եկեղեցական հարկը գանձվում է պետական ծառայողների կողմից, այնուհետև փոխանցվում եկեղեցական համայնքներին: Այս հարկը եկեղեցու հիմնական եկամուտն է:
