Երեկ` սեպտեմբերի 20-ին, վրաերթ է տեղի ունեցել Արմավիրի մարզում: Ժամը 22.20-ի սահմաններում անհայտ մակնիշի և համարանիշի ավտոմեքենայի վարորդը Երևան-Արմավիր ավտոճանապարհի Մուսալեռ գյուղի հատվածում վրաերթի է ենթարկել 36-ամյա Արմեն Չախլոյանին և թողնելով անօգնական` դիմել փախուստի:
Ֆոտոլրագրող Գագիկ Շամշյանը shamshyan.com-ին հայտնել է, որ վրաերթի ենթարկվածը ծայրահեղ ծանր վիճակում տեղափոխվել է Վաղարշապատի բժշկական կենտրոն: Դեպքի վայր են ժամանել Ճանապարհային ոստիկանության 2-րդ սպայական գումարտակի 1-ին վաշտի 1-ին դասակի աշխատակիցները` վաշտի հրամանատար Տիգրան Գրիգորյանի, դասակի հրամանատար Գրիգոր Գրիգորյանի գլխավորությամբ:
Քննչական աշխատանքները ղեկավարել է Ոստիկանության քննչական գլխավոր վարչության Արմավիրի մարզի քննչական բաժնի Վաղարշապատի քննչական բաժանմունքի ավագ քննիչ Արմեն Օսեյանը:
Գ.Շամշյանը հայտնել է, որ մինչ ոստիկանությունը վրաերթի վայրում քննչական գործողություններ էր կատարում, ՃՈ 2-րդ սպայական գումարտակի 1-ին վաշտի աշխատակիցները, օպերատիվ տվյալներն իրացնելով, վրաերթի վայրից մեկուկես կիլոմետր հեռավորության վրա` կիսակառույց շինությունների հարևանությամբ, դաշտի մեջ, հայտնաբերում են «ԲՄՎ» մակնիշի 11 ԼՕ 700 համարանիշի ավտոմեքենան:
Ավտոմեքենայի դիմապակին ամբողջովին վնասված էր և արյունոտված:
Գ.Շամշյանը հայտնել է, որ իր տեղեկություններով, ավտոմեքենան հաշվառված է Երևանի Զաքյան փողոցի բնակիչ Գագիկ Սեկոյանի անվամբ:
Վրաերթի վայրում հավաքվածները Գ.Շամշյանին պատմել են, որ վրաերթի ենթարկվածը ԱՄՆ քաղաքացի է և ժամանակավորապես բնակվում է Արարատի մարզի Գեղանիստ գյուղում:
Ոստիկանության Արմավիրի մարզային վարչության և Վաղարշապատի բաժնի օպերատիվ-քննչական խմբերը ձեռնարկում են միջոցառումներ` հայտնաբերելու համար վրաերթ կատարած վարորդին:
