Մեծ աղմուկ է բարձրացել սննդի անվտագության հարցի շուրջ: Չորեքշաբթի օրը արևմտյան ԶԼմ-ները հաղորդել են, որ գաղտնի հետազոտության արդյունքում պարզ է դարձել, որ երկու տարի շարունակ եգիպտացորենով սնվող առնետների օրգանիզմում առաջացել է չարորակ գոյացություն` պինգ-պոնգի գնդակի չափի: Առնետներն այդ ընթացքում սնվել են գենետիկորեն փոփոխված ամերիկյան Monsanto եգիպտացորենով:
Ժամանակին Եվրահանձնաժողովը թույլ է տվել գենետիկորոն փոփոխված ամերիկյան եգիպտացորենի ներկրումը Եվրոպա, քանի որ պարզվել էր, որ այն ոչ մի բացասական ազդեցություն չի ունենում մարդու առողջության վրա:
«Առաջին անգամ է, որ գենետիկորեն փոփոխված մթերքը` թունաքիմիկատի օգտագործմամբ, հետազոտվում է տևական ժամանակահատվածում` առողջության վրա ունեցած ազդեցությունը պարզելու համար: Մինչ այդ այդպիսի մթերքի հետազոտությունն իրականացվում էր ավելի կարճ ժամանակատվածում և գործադիր մարմինների կամ արդյունաբերության ոլորտի աշխատակիցների կողմից»,- հայտարարել է հետազոտության հեղինակ`Ժիլ-Էրիկ Սերալինին:
Իր հերթին, Եվրահանձնաժողովի պաշտոնական ներկայացուցիչը հաղորդել է, որ իրենք սննդի անվտանգության եվրոպական գործակալությունից արդեն պահանջել են համապատասխան հետազոտության արդյունքները: Նա նաև տեղեկացրել է, որ գենափոխված ցանկացած մթերք, որ առաջարկվում է վաճառել ԵՄ տարածքում, երեք ամիս փորձաշրջան է անցնում:
Առնետների դեպքում իրականացվել է հետևյալ փորձը. երկու տարի շարունակ 200 առնետի կերակրել են եգիպտացորենով: Նրանց բաժանել են երեք խմբի. առաջինին կերակրել են գենետիկորոն փոփոխված եգիպտացորենով, երկրորդին` ամենատարածված Roundup թունաքիմիկատով մշակված գենափոխված եգիպտացորենով, իսկ երրորդին` սովորական եգիպտացորենով` վերամշակված սովորական թունաքիմիկատով:
Պարզվել է, որ չվերամշակված սովորական եգիպտացորենից մահվան ավելի քիչ դեպքեր են գրանցվում, քան վերամշակված գենափոխված տարբերակների դեպքերում:
Հետազոտության արդյունքները ներկայացվելու են սեպտեմեբրի 26-ին տեղի ունենալիք «Մենք բոլորս փորձադաշտ ենք» ֆիլմի շնորհանդեսով:
