Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին հայտարարել է, որ անհրաժեշտ է ստեղծել Գլդանի բանտի սկանդալային գործով հատուկ հանձնաժողով, որում կներգրավվեն խորհրդարանի ու հասարակության ներկայացուցիչները:
Ուժային կառույցների ներկայացուցիչների հետ հանդիպման ժամանակ Սաակաշվիլին հայտարարել է, որ այդ հանձնաժողովին պետք է միանա նաև ժողովրդական պաշտպանը (օմբուդսմեն), որի ներկայացուցիչները մշտական հենքով պետք է գտնվեն վրացական բոլոր բանտերում.
«Անհրաժեշտ է բոլոր բանտերում ունենալ օմբուդսմենի ներկայացուցիչ: Նրանք պետք է լինեն ամենուր, ոչ թե ներկայիս նման հայտնվեն միայն ժամանակ առ ժամանակ: Ժողովրդական պաշտպանը Թբիլիսիում չէ, և հենց նա գա, ես կհանդիպեմ նրա հետ: Այս ողջ տարիներին Գիորգի Տուգուշիից մշտապես լսում ենք բազմաթիվ քննադատություններ, և ինչպես պարզվեց, նրա քննադատությունը տեղին էր: Ամենուրեք պետք է բացվեն նրա ներկայացուցչությունները, և նա պետք է իր խմբերին մշտապես ուղարկի մոնիթորինգի այնտեղ, որտեղ որ ցանկանում է»:
Սաակաշվիլին նաև հանձնարարել է Գլդանի դեպքերից տուժած բոլոր բանտարկյալներին տեսահանդիպումներ նշանակել իրենց հարազատների հետ՝ նրանց հանգստացնելու համար. «25,000 ընտանիքներ նյարդայնացած են հեռուստատեսությամբ իրենց տեսածից, և եթե նրանք ցանկություն ունեն, ապա թող ընդգրկվեն ցուցակում և հանդիպեն բանտարկյալների հետ»:
Ուշագրավ է, որ ուժային կառույցների ներկայացուցիչների հետ խորհրդաժողովին չի մասնակցել ներքին գործերի նախարար Բաչո Ախալայան, որի հրաժարականը պահանջում են Գլդանի դեպքերից զայրացած, Թբիլիսիի և մյուս քաղաքների փողոցներ դուրս եկած ցուցարարները:
