Եվրամիությունը ձեռնամուխ է լինում Հայաստանում գյուղատնտեսության մրցունակության բարձրացմանը: Այսօր Երևանում մեկնարկել է «ԵՄ փորձի միջոցով Հայաստանում գյուղատնտեսության մրցունակության բարելավում» թեմայով երկօրյա սեմինարը, որին մասնակցում են փորձագետներ ԵՄ անդամ երկրներից՝ Ֆինլանդիայից, Ռումինիայից, Լեհաստանից, ինչպես նաև ոլորտի տեղի պաշտոնյաներ:
ՀՀ գյուղատնտեսության նախարար Սերգո Կարապետյանը կարևորեց ԵՄ-ի հետ ՀՀ գյուղատնտեսության ինտեգրման անհրաժեշտությունը. «Խնդիրների լուծման գործընթացում չափազանց կարևորվում են Եվրամիության փորձի ուսումնասիրումը և դրանց կիրառման հնարավորությունների գնահատումն ու լավագույն փորձի ներդրումը, ինչը, անշուշտ, կնպաստի գյուղատնտեսության առջև ծառացած խնդիրների աստիճանական լուծմանը և ոլորտի մրցունակության բարձրացմանը»:
Սեմինարի ընթացքում մասնակիցները կքննարկեն գյուղական զարգացման քաղաքականության և ազգային ռազմավարության հիմնական բաղադրիչների մշակման, վարչական կառուցվածքների և ընթացակարգերի բարելավման նպատակով գյուղական զարգացման ծրագրերի մշակման, իրականացման և կառավարման, ինչպես նաև ագրարային համակարգի համաչափ զարգացմանն անհրաժեշտ այլ կարևոր հարցեր ու առաջարկներ: