ՀՀ կրթության և գիտության նախարար Արմեն Աշոտյանի հրամաններով ոչ պետական 24 բարձրագույն ուսումնական հաստատությունների բարձրագույն մասնագիտական կրթական ծրագրերով լիցենզիաների պարտադիր պայմանների ու պահանջների պահպանման նպատակով իրականացված ստուգումների արդյունքները քննարկվել են ԿԳՆ-ի կրթական ծրագրերի իրականացման լիցենզավորման հանձնաժողովի հերթական նիստի ընթացքում:
Հանձնաժողովի փակ գաղտնի քվեարկությամբ կայացված որոշման հիմքով և ԿԳ նախարարի համապատասխան հրամաններով ամբողջովին կասեցվել են`
«Հայաստանի Ավետարանական Աստվածաբանական Ակադեմիա» հիմնադրամի բարձրագույն մասնագիտական կրթական ծրագրով կրթական գործունեություն իրականացնելու N 288 լիցենզիայի գործողությունը,
Հայաստանում «Գերմանական համալսարան» հիմնադրամի բարձրագույն մասնագիտական կրթական ծրագրով կրթական գործունեություն իրականացնելու N 1065 լիցենզիայի գործողությունը:
Մասնակի կասեցվել են «ՅՈՒ ԷՍ Ի ԷԼ» համալսարան» սահմանափակ պատասխանատվությամբ ընկերության բարձրագույն մասնագիտական կրթական ծրագրով կրթական գործունեություն իրականացնելու N 791 լիցենզիայի գործողությունը` մագիստրոսի որակավորման աստիճանով, առկա ուսուցմամբ, «Տնտեսագիտություն», «Իրավագիտություն», «Լրագրություն», «Օտար լեզու և գրականություն» մասնագիտությունների մասով,
Երևանի «Հրաչյա Աճառյան» համալսարան» արտադրական կոոպերատիվի բարձրագույն մասնագիտական կրթական ծրագրով կրթական գործունեություն իրականացնելու N 167 լիցենզիայի գործողությունը` բակալավրի և մագիստրոսի որակավորման աստիճաններով, առկա ուսուցմամբ, «Կիրառական մաթեմատիկա» և «Աշխարհագրություն» մասնագիտությունների մասով:
Դադարեցվել է Երևանի «Ալաշկերտ» համալսարան» սահմանափակ պատասխանատվությամբ ընկերության բարձրագույն մասնագիտական կրթական ծրագրով կրթական գործունեություն իրականացնելու N 064 լիցենզիայի գործողությունը:
Հանձնաժողովն ի գիտություն է ընդունել
«Ռոսլին» արվեստի ինստիտուտ» և «Երևանի Լորիս Քալաշյանի անվան բաց համալսարան» սահմանափակ պատասխանատվությամբ ընկերությունների միացումը «Հայբուսակ» համալսարան» սահմանափակ պատասխանատվությամբ ընկերությանը` հիմք ՀՀ իրավաբանական անձանց պետական ռեգիստրի Շենգավիթի տարածքային բաժնի 2011թ. փետրվարի 10-ի թիվ 1 արձանագրությունը:
Մի շարք բարձրագույն ուսումնական հաստատություններին տրվել է նախազգուշացում ստուգման արդյունքում արձանագրված շտկելի խախտումները վերացնելու և արդյունքների մասին հիմնավորող փաստաթղթեր ՀՀ կրթության և գիտության նախարարություն ներկայացնելու համար:
