Այսօր Ռուսաստանը ԿԺԴՀ-ի հետ համաձայնագիր է ստորագրել հյուսիսկորեացիների 11 մլրդ դոլար պարտքը ներելու մասին: ԽՍՀՄ-ը անցյալ դարի կեսերից Հյուսիսային Կորեայի համար վարկային գիծ էր բացել: Բացի այդ` արտոնյալ պայմաններով էներգառեսուրսներ, պարենամթերք և այլ ապրանքներ էր մատակարարում: Իսկ 90-ական թվականներին կորեացիների պարտքը զգալիորեն աճել էր: Եվ վերջապես` ՌԴ-ն որոշեց ԿՀԴՀ-ին ներել այդ պարտքը:
Հիշեցնենք, որ ՌԴ-ն ներել է նաև մի քանի այլ պետությունների պարտքերը: Օրինակ՝ Աֆղանստանին ներեց 12 մլրդ դոլար, Ալժիրին՝ 8 մլրդ դոլար: Կուբայի պարտքը կազմում է 20 մլրդ դոլար, բայց այս երկիրը հրաժարվում է այն վճարել: Այս ամենը ուշագրավ է այն առումով, որ 10 տարի առաջ նույն ՌԴ-ն չներեց իր ռազմավարական գործընկերոջ` Հայաստանի ընդամենը 93 մլն դոլար պարտքը և փոխարենը վերցրեց 4 խոշոր ընկերություններ՝ «Մարս» ՓԲԸ-ն (գնահատված 56 մլն դոլար), «Երևանի մաթեմատիկական մեքենաների գիտահետազոտական ինստիտուտը» (2,75 մլն դոլար), «Երևանի ղեկավարման ավտոմատացված համակարգերի ԳՀԻ»-ն (3,37 մլն), «Երևանի նյութագիտության ԳՀԻ»-ն (0,35 մլն) և Հրազդանի ՋԷԿ-ը (31 մլն): Այս ընկերություններից միայն Հրազդանի ՋԷԿ-ն է այսօր աշխատում: Մյուսների հետ կապված գրեթե ամեն տարի ՌԴ-ն ու ՀՀ-ն տարբեր ծրագրեր են մշակում, որոնք այդպես էլ իրականություն չեն դառնում:
Եվ մինչև այսօր էլ հայ հասարակությանը հետաքրքրում է, թե ինչու ՌԴ-ն չներեց մեր երկրի պարտքը, ինչը այլ երկրների հսկայական պարտքերի համեմատ չնչին էր:
««Գույք` պարտքի դիմաց» ծրագրում ես ոչ թե մեղադրում եմ Ռուսաստանին, այլ Հայաստանի այն ժամանակվա գործող նախագահին: Դա իր գործած «հերոսությունն է», թող ինքը մեկնաբանի, թե ինչը ինչի համար է տվել»,- «Առաջին լրատվական»-ի հետ զրույցում ասաց «Հանրապետություն» կուսակցության ղեկավար Արամ Սարգսյանը:
Նրա խոսքերով` «Գույք` պարտքի դիմաց» ծրագիրը ամենակոպիտ, ամենաազգատյաց նախագիծն էր, որ երբևէ իրականացրել են ՀՀ իշխանությունները: «Իսկ Ռուսաստանի իշխանություններից բարոյականություն պահանջելու իրավունք ես չունեմ, ոչ էլ դա կոռեկտ եմ համարում: Այդ երկիրը մտածում է իր սեփական շահերի մասին, իր խնդիրներն է փորձում լուծել և յուրաքանչյուրի հետ վարվում է այնպես, ինչպես դիմացինն իրեն թույլ է տալիս: Այդ իշխանություններն իրենց աթոռն ու պաշտոնը պահելու համար հայկական գույքը տվել են պարտքի դիմաց»,- ավելացրեց Ա. Սարգսյանը:
Մեր հարցին` իսկ Հայաստանը կարո՞ղ էր խուսափել այդ ծրագրից, Ա. Սարգսյանը պատասխանեց. «Ես շատ լավ հիշում եմ, որ ՌԴ նախագահ Վլադիմիր Պուտինը Հայաստանում հայտարարեց, որ դա իրեն առաջարկել է ՀՀ նախագահը: ՀՀ նախագահն էլ նստած՝ չասաց, թե ինքը չի առաջարկել: Հակառակը՝ նա ասում էր` ամեն ինչ անելու է, որ ռուսական կապիտալը մտնի Հայաստան»:
Ա. Սարգսյանի խոսքերով` ՌԴ-ն այդ ընկերությունները չի վերագործարկում, որովհետև այդ երկիրը Հայաստանում տնտեսություն զարգացնելու խնդիր չունի: «ՌԴ-ն իր երկրում տնտեսությունը զարգացնել չի կարողանում: ՌԴ-ն ինքը հանքահումքային ռեսուրսների վրա նստած տերություն է: Ինքը իր երկրում տնտեսական լուրջ խնդիրներ ունի, Հայաստանում ինչպե՞ս պետք է զարգացնի: ՌԴ-ի խնդիրը ՀՀ-ն կախման մեջ պահելն է, ոչ թե ներդրումներ անելը: Ինքը դրանով իր քաղաքական ազդեցությունը մեծացրեց` ուրիշ ոչինչ»,- եզրափակեց Ա. Սարգսյանը:
