Հնարավոր է` Սերիբիայի իշխանությունները համազգային հանրաքվե կազմակերպեն, որում քննարկվի Կոսովոյի անկախությունը ճանաչելու մասին հարցը` հանուն հետագայում ԵՄ-ին անդամակցության, երեքշաբթի փոխանցել է Բելգրադի ազդեցիկ “Вечерне новости” թերթը` հղում անելով կառավարության և նախագահի վարչակազմի աղբյուրներին:
Կոսովոյի անկախության հարցը, որն ԱՄՆ-ի և ԵՄ-ի առաջատար երկրների աջակցությամբ 2008-ին առաջ են քաշել Կոսովոյի ալբանացիները, Սերբիայի համար ամենացավոտն է: Միջազգային շատ փորձագետներ բացեիբաց հայտարարում են, որ ԵՄ-ին Սերբիայի միանալը հնարավոր կլինի միայն Կոսովոյի անկախությունը ճանաչելուց հետո:
Արևմուտքի կողմից Սերբիայի ճնշման պայմաններում անհրաժեշտ է Կոսովոյի հարցում «և՛ Կոսովո, և՛ ԵՄ» քաղաքականության փոխարեն, որը ենթադրում էր ինքնահռչակ հանրապետության մնալը Սերբիայի կազմում և ԵՄ-ին մոտենալու պահանջների միաժամանակ կատարում, մշակել նոր քաղաքականություն: Այսպիսի հայտարարություն անցյալ շաբաթ արել է ԳԴՀ-ի կառավարող քրիստոնեադեմոկրատական կուսակցության բարձրաստիճան ներկայացուցիչ Անդրես Շոկենհոֆը:
Սպասվում է, որ այս հարցը կհստակեցվի սեպտեմբերի վերջին ՄԱԿ-ի Գլխավոր ասամբլեայի նիստից հետո, որտեղ Սերբիայի ղեկավարները կփորձեն իմանալ Սերբիայի եվրոինտեգրման համատեքստում Կոսովոյի հարցի վերաբերյալ աշխարհի առաջատար երկրների վերաբերմունքը:
