«Մանչեսթեր Յունայթեդ»-ի գլխավոր մարզիչ Ալեքս Ֆերգյուսոնն իր ակնկալիքներն է հայտնել Չեմպիոնների լիգայի այս տարվա խաղարկությունից:
«Մենք միշտ էլ Չեմպիոնների լիգան հաղթելու լավ հնարավորություններ ենք ունեցել: Երկու անգամ միայն պարտվել ենք եզրափակչում՝ կատալոնական «Բարսելոնա»-ի դեմ հանդիպման ժամանակ: Մենք ցանկանում ենք բարելավել այդ ցուցանիշը: Ցանկանում ենք ավելի լավ հանդես գալ՝ նախորդ տարիների համեմատ: Սրա վերաբերյալ նույնիսկ խոսք լինել չի կարող:
Այս մրցաշարի մթնոլորտն ու խարիզման անբնութագրելի են: Եվ, իհարկե, երբ հաղթում ես, քո մակարդակը բարձրանում է ողջ Եվրոպայում, ինչպես, օրինակ, «Ռեալ»-ի ու «Միլան»-ի պարագայում պատահեց: Ուզում ենք ամենաշատ հաղթանակները տանել Չեմպիոնների լիգայի շրջանակներում:
Պատահում է նաև, որ եզրափակչում իրար չեն հանդիպում ամենաուժեղ թիմերը, ինչպես եղավ այն ժամանակ, երբ «Մոնակո» – «Պորտու» եզրափակիչն էր:
Սակայն բոլորն են սպասում, որ այս մրցաշարում հաղթի աշխարհի ուժեղագույններից մեկը: Իմ կարծիքով՝ այս տարի ևս կարող է անակնկալ լինել. ո՞վ էր սպասում, որ անցած մրցաշարում հաղթող կճանաչվի Լոնդոնի «Չելսի»-ն:
Ինչ վերաբերում է «Սիթի»-ին, նրանք շատ բարդ խմբում են հայտնվել: Բայց և այնպես, ես ամենևին էլ չեմ ուզում ասել, որ նրանք դուրս չեն գալու հաջորդ փուլ: Ամեն դեպքում` ո´ր երկու թիմն էլ հաղթող ճանաչվի, ուրեմն արժանի է հաղթանակին:
Առաջին հերթին մեզ անհանգստացնում է այն հարցը, թե ինչպես է պետք դուրս գալ հաջորդ փուլ: Եթե մեզ չհաջողվի դուրս գալ հաջորդ փուլ, քննադատությունների տարափ է տեղալու, ու դա նորմալ է: Մենք սովոր ենք դառնությունների, սակայն չենք պատրաստվում այդքան շուտ թողնել այս մրցաշարը»,- «Մանչեսթեր Յունայթեդ»-ի պաշտոնական կայքի փոխանցմամբ՝ ասել է Ֆերգյուսոնը:
