YouTube-ը Հնդկաստանի տարածքում արգելափակել է հակաիսլամական ֆիլմի ցուցադրությունը, որը բողոքի ակցիաներ է առաջացրել մի շարք մահմեդական երկրներում: Այս մասին ինչպես հաղորդում է Agence France-Presse-ը հայտարարել է Google-ի անանուն ներկայացուցիչը:
Google-ը չի մանրամասնել՝ մուտքը փակվել է նրանց սեփական նախաձեռնությամբ, թե Հնդկաստանի իշխանությունների խնդրանքով: Գործակալության աղբյուրը միայն նշել է, որ ընկերությունը նյութը արգելափակում է միայն համապատասխան դատական որոշման կամ օրինական հիմքի վրա:
ԱՄՆ-ում նկարահանված «Մահմեդականների անմեղությունը» ֆիլմը ծաղրում է Մուհամմեդ մարգարեին: Մի շարք մահմեդական երկրներում տեղի են ունեցել բողոքի ակցիաներ, որոնք անկարգությունների են հանգեցրել ամերիկյան դեսպանատների մոտ:
Google-ը հրաժարվել է ջնջել տեսանյութը YouTube-ից, սակայն այն արգելափակել են Լիբիայի և Եգիպտոսի օգտատերերի համար: Աֆղանստանում իշխանություններն արգելափակել են ամբողջ YouTube-ը:
