«Փաստարկ» ակումբում հյուրընկալված Հայ ազգային կոնգրեսի համակարգող Լևոն Զուրաբյանը Մարտի 1-ի հանրահավաքից առաջ հանդես եկավ բավական կոշտ հայտարարություններով. նրա գնահատականները, կարելի է ասել, ի համեմատություն նախորդների` ինչ-որ առումով նույնիսկ անակնկալ էին լրագրողների համար:
Կոնգրեսի համակարգողը նախ շեշտեց, որ ՀԱԿ-ը սկսել է հանրահավաքային շարք, ինչպես և հայտարարվել էր փետրվարի 18-ին. «Մեր նպատակն է այս բռնապետությանը պարտադրել արտահերթ ընտրություններ և կատարել շարժման պահանջները, և ես կարծում եմ, որ մարտը և ապրիլի սկիզբը այս առումով լինելու են իշխանությունների համար վերջին շանսը, որ նորմալ քաղաքական, բանական պրոցեսների սահմաններում մենք կարողանանք հասնել մեր նպատակներին»:
Լ.Զուրաբյանը նշեց, որ օրերս Հարավային Կովկասում ԵՄ հատուկ ներկայացուցիչ Սեմնեբիի հետ հանդիպմանը Լևոն Տեր-Պետրոսյանը նկատել է, որ ցանկացած բռնապետություն ինքնին արդեն կոնֆլիկտ է… Լ.Զուրաբյանը զարգացրեց այս թեման. «Դա կոնֆլիկտ է ռեժիմի և ժողովրդի միջև և, ինչպես ցանկացած կոնֆլիկտ, հղի է պայթյունով ու անկանխատեսելի հետևանքներով: Ինչպես ցանկացած կոնֆլիկտում, կան կոնֆլիկտի լուծման խաղաղ ճանապարհներ` բանակցությունների միջոցով: Բայց նաև հայտնի է բոլորին, որ եթե կոնֆլիկտը երկար ժամանակ չի լուծվում խաղաղ բանակցություններով, ապա լուծվում է պատերազմով: Կարծես միջազգային հանրությունն այսօր հասկանում է, որ այնպիսի կոնֆլիկտը, որը էությամբ ներկայացնում է բռնապետությունը, խնդիր է ոչ միայն տվյալ ժողովրդի, այլ նաև միջազգային անվտանգության համար»: ՀԱԿ համակարգողը շեշտեց, որ Մարտի 1-ը այս առումով լինելու է հնարավորություն` սկիզբ դնել այդ կոնֆլիկտի լուծմանը. «Մենք գերադասում ենք, որ դա լինի խաղաղ բանակցությունների ճանապարհով»: Նա հայտնեց նաև, որ նոր շերտեր են միանում համաժողովրդական շարժմանը, և վստահեցրեց, որ մարտի 1-ի հանրահավաքը լինելու է հանգրվանային: «Մենք պետք է ապացուցենք իշխանություններին, որ այլևս Մարտի 1 չի լինի»:
Լ.Զուրաբյանը նկատեց, որ միջազգային հանրությունը կարծես սկսել է հասկանալ, որ մարդասպանները և բռնակալները այսօրվա աշխարհում տեղ չունեն: «Մենք տեսնում ենք, որ այս իրադարձությունները ստեղծել են նոր միջազգային ֆոն, երբ վերջին տարիներին առաջին անգամ միջազգային հանրությունը կարծես սկսում է հասկանալ, որ մարդասպան բռնապետները, սեփական ժողովրդի դեմ ուժ կիրառող ղեկավարները այսօր տեղ չունեն աշխարհում: Դրա լավագույն օրինակը Լիբիայում կատարվող իրադարձություններն են: Եվ մենք տեսնում ենք, որ վերջապես միջազգային հանրությունը ադեկվատ գնահատական է տալիս սեփական ժողովրդի դեմ բռնությունների իրագործմանը»: Լ.Զուրաբյանը ցավով փաստեց, որ միջազգային հանրության կողմից նույն համերաշխությունը չեղավ 2008-ի մարտի 1-ին. «Աշխարհը այն ժամանակ քնած էր և գերադասեց աչք փակել փոքրիկ Հայաստանում տեղի ունեցող իրադարձությունների վրա: Մենք երեք տարի մեր պայքարը տարանք միջազգային մեկուսացման պայմաններում: Փառք Աստծո, սա հաղթահարվում է, աշխարհը հասկանում է, որ Քադաֆիի կամ Քոչարյանի նման մարդիկ պետք է ավարտեն իրենց կյանքը Հաագայի քրեական դատարանների կողմից կատարված վճիռների սահմաններում, և սա իսկապես լավ զարգացում է, որը նոր հնարավորություններ է ստեղծում մեր համաժողովրդական շարժման համար»:
Կոնգրեսի համակարգողի մատուցմամբ, մարտի 1-ի հանրահավաքի ուղերձը լինելու է հետևյալը` ցանկացած բռնություն տասնապատիկ հակահարված է ստանալու ժողովրդի կողմից:
«Ժամանակ» օրաթերթ
