Սա կարող է գրվել Գինեսի ռեկորդների գրքում:
2010թ. դեկտեմբերը, թերևս, Հայաստանի իրավական կամ օրենսդրության պատմության մեջ մնա «սև դեկտեմբեր» անվամբ:
Այդ ամսվա վերջին կառավարության պահանջով գումարված ԱԺ արտահերթ նստաշրջանում հապճեպ ընդունված օրենքները դեռ երկար կհիշեցնեն սերունդներին մեր իշխանությունների մտավոր կարողությունների և մասնագիտական որակների մասին:
«Սև դեկտեմբերին» կատարված փոփոխություններից մեկն էլ վերաբերում էր 2011թ. հունվարի 1-ից ՀՀ-ում ժամանակավոր անաշխատունակության նպաստները` հղիության նպաստները, եկամտահարկով հարկմանը: Դեկտեմբերին ընդունված «Եկամտային հարկի մասին ՀՀ օրենք» կոչվածը, որը գործելու է 2013թ. հունվարի 1-ից, ևս ամրագրում է, որ Հայաստանի Հանրապետության օրենսդրության համաձայն` վճարվող նպաստների գումարը համարվում է նվազեցվող եկամուտ, սակայն «Ժամանակավոր անաշխատունակության նպաստների մասին» ՀՀ օրենքով սահմանված նպաստների գումարները այդպիսին չեն համարվում: Սակայն իշխանությունները, չսպասելով 2013-ին, որոշեցին հենց 2011-ից հարկել հղիներին:
Իհարկե, «հարկել հղիներին» արտահայտությունը այնքան էլ ճիշտ չէ, քանի որ այդ նպաստի իմաստն ու տրամաբանությունն այն է, որ դա տրվում է դեռ չծնված երեխային: Այսինքն` ավելի ճիշտ է ասել` մեր իշխանությունները որոշեցին հարկել նաև դեռ չծնված երեխաներին:
«Հղիության նպաստը չէր հարկվում մինչև 2011թ. հունվարի 1-ը: Էս մեր վարչապետը, փաստորեն, 2011թ. հունվարի 1-ից սկսել է հարկել չծնված երեխաներին: Էդ նպաստը մոր համար չէ, երեխայի համար է, որը դեռ չի ծնվել: Երկու ամիս է` դրել հարկում է, որևէ մեկը բունտ չի անում»,- «Ժամանակ»-ի հետ զրույցում ասաց ՀՀ նախկին վարչապետ Հրանտ Բագրատյանը:
Նրա խոսքով, աշխարհի ոչ մի երկրում նման բան չկա: «Ես նամակ գրեցի «Գինեսի ռեկորդներ»-ի գրքին, ներկայացրեցի իրավիճակը, ասեցի, որ աշխարհում մի այսպիսի երկիր կա, որտեղ հարկում են նույնիսկ չծնված երեխաներին: Հարցրեցի, թե արդյոք սա «Գինեսի ռեկորդներ»-ի գրքում գրանցվելու արժանի՞ է, թե՞ չէ: Ինձ պատասխանեցին, թե դեռ չգիտենք, այս հարցը մենք ուսումնասիրում ենք»,- նշեց ՀՀ նախկին վարչապետը:
Հարցին, թե աշխարհում էլ ի՞նչ նմանատիպ անհեթեթ հարկեր կան, Հ.Բագրատյանը պատասխանեց, թե ինքը երկու դեպք է հիշում: «Պատմականորեն ես նման հիմար հարկերի երկու դեպք գիտեմ: Բայց դրանք երկուսն էլ էլի ինչ-որ իմաստ ունեին: Առաջինը Պյոտր Առաջինի սահմանած հարկն էր մորուքների վրա: Երկրորդը` ականջների հարկն էր, որ 1926թ. սահմանեց Դալայ Լաման Տիբեթում: Էն մարդիկ (Աֆրիկայում էլ այդպիսի ցեղեր կան) ականջների մեջ օղեր էին դնում, որ ականջները երկարացնեն: Մեծ ականջը Տիբեթում համարվում էր առավելություն, տղամարդկության նշան: Այդ օղերից հաճախ ինֆեկցիա էր առաջանում, մարդիկ մեռնում էին: Էս Դալայ Լաման, որ էն ժամանակ, եթե չեմ սխալվում, 12 տարեկան էր, հարկ է դնում, որ մարդիկ էլ ականջների մեջ օղեր չդնեն: Այսինքն` այդ հարկը նրա համար էր, որ այդ հիմարությամբ մարդիկ էլ չզբաղվեն, թե չէ ի՞նչ գեղեցկության նշան է երկար ականջը»,- ասում է Հ.Բագրատյանը:
Մնում է միայն կռահել, թե ինչ իմաստ է հղիներին հարկելու մեջ դնում ՀՀ վարչապետ Տ.Սարգսյանը:
«Ժամանակ» օրաթերթ