Ազգային ժողովում «Բարգավաճ Հայաստան» խմբակցության անդամ, նախկին արտգործնախարար Վարդան Օսկանյանը կարծում է, որ Հայաստանի երկրորդ խոշոր քաղաքում` Գյումրիում, ԲՀԿ-ի հաղթանակը ցույց է տալիս, որ Հայաստանում առկա միակուսակցական համակարգը սկսել է զիջել իր դիրքերը:
Սեպտեմբերի 9-ին Գյումրիում տեղի ունեցած ՏԻՄ ընտրությունների արդյունքում, հիշեցնենք, քաղաքապետ է ընտրվել ԲՀԿ թեկնածու Սամվել Բալասանյանը, ում բացի ԲՀԿ-ից, աջակցում էր նաև իշխող Հանրապետականը:
«Մեր խնդիրների, չարիքների հիմնական պատճառը քաղաքական մենաշնորհն է: Բոլոր մյուս խնդիրները, որոնք առօրյա մեր կյանքի վրա զգում ենք, տնտեսական մենաշնորհը, կոռուպցիան, չարաշահումները, անարդարությունը, հետևանք են այդ քաղաքական մենաշնորհի: Այս ՏԻՄ ընտրությունները գուցե սկիզբն էին իշխանության այդ տարաձուլման: Երկրորդ մեծ քաղաքում արդեն մի այլ կուսակցության ներկայացուցիչ է», – հինգշաբթի օրը «Ազատություն» ռադիոկայանին տված հարցազրույցում ասել է Վարդան Օսկանյանը:
Ըստ Օսկանյանի, Գյումրիում, որտեղ մայիսին կայացած խորհրդարանական ընտրությունների ժամանակ ԲՀԿ-ն ստացավ առավելագույն թվով ձայները, ՀՀԿ-ն այլընտրանք չուներ, քան ԲՀԿ-ի թեկնածուին աջակցելն էր:
«Եկեք դա դիտարկենք խորհրդարանական ընտրությունների արդյունքների համատեքստում, որովհետև այնտեղ արդեն ապացուցվել էր, որ կուսակցությունը մեծ հեղինակություն ունի, մեծ աջակցություն ունի, և ում թեկնածությունը, որ կուսակցությունը պաշտպանի, նա էլ կընտրվի: Ես կարծում եմ, սա ՀՀԿ-ի կողմից տակտիկական քայլ էր, այլընտրանք չունեին, ԲՀԿ-ի թեկնածուն հաղթելու էր: Չուզեցան այնպես երևա, որ պարտվում են այդ քաղաքում, դրա համար էլ աջակցեցին [Բալասանյանին]: Անկախ դրանից ԲՀԿ-ի թեկնածուն այնտեղ հաղթելու էր», – ասել է Օսկանյանը:
Օսկանյանի կարծիքով` այսօրվա հիմնական խնդիրներից մեկը, որը պետք է հաղթահարվի, իշխանության տարաձուլումն է, որպեսզի տարբեր կուսակցություններ ավելի մեծ դերակատարություն ունենան և իշխանության բաժանումը կուսակցությունների միջև ավելի հստակ լինի:
«Գյումրիում ԲՀԿ-ի հաղթանակը համարենք դրա կարևորագույն առաջին քայլերից մեկը, համենայնդեպս, այդ ուղղությամբ պայքարը շարունակվելու է: Ես անձամբ հետևողական եմ լինելու, որ վերջիվերջո մենք հասնենք նրան, որ մեր քաղաքական համակարգում իսկական հակակշիռներ լինեն, որպեսզի կարողանանք արդեն համատեղ որոշումներով երկիրը դնել զարգացման ճիշտ ճանապարհին», – ասել է նա:
