Լիբիայի ղեկավարի որդին` Սայֆ Ալ-Իսլամ Քադաֆին, այսօր առաջին անգամ հրավիրել է օտարերկրյա լրագրողներին` հայտնելով, որ ահաբեկիչների նկատմամբ հաղթանակը շատ մոտ է, իսկ նրանց կողմից դիմադրությունը միայն երկու քաղաքներում է շարունակվում` Ալ-Զավիյայում և Միստրատում: Այս մասին հաղորդում է Reuters գործակալությունը:
«Ես կարծում եմ, որ մեծ արյունահեղություն չի լինի, իսկ վաղը մենք արդեն լուծած կլինենք մեր խնդիրները»,- ասել է Սայֆ Ալ-Իսլամը: Նա խոստացել է, որ բանակը չի գրոհելու ահաբեկիչներին, քանի որ նրանց զենքն ու զինամթերքն արդեն ավարտվում է: Նա նաև խոսել է բանակցությունների և բարեփոխումների մասին` ափսոսանք հայտնելով, որ հենց ամենասկզբից օտրարերկրյա լրագրողներին թույլ չի տրվել լուսաբանելու տեղի ունեցողը, ինչը վերջիններիս թույլ կտար համոզվելու Քադաֆիների ասածների իրավացիության մեջ:
Սակայն իրականում Քադաֆիների այժմյան հայտարարություններն ու գործողությունները չեն համընկնում մեկը մյուսի հետ: Երեկ` փետրվարի 25-ին, Մուամար Քադաֆին կրկին խոսել է Տրիպոլիի կենտրոնական հրապարակում` խոստանալով զենք բաժանել իր կողմնակիցներին և կոչ անելով երգել, պարել ու պատրաստվել պայքարի թշնամիների հետ: «Եթե նրանք ուզում են, մենք կվերացնենք նրանց»,- ասել է Քադաֆին` հայտնելով, որ հրամայել է բացել բոլոր պահեստները և զենքը բաժանել իր կողմնակիցներին: