Աշխարհի լավագույն դիզայներներն այս օրերին Նյու Յորքում են` «Մերսեդես Բենց» նորաձևության շաբաթվա շրջանակներում: Առավել դրական գնահատականի են արժանացել այն դիզայներները, ովքեր նախընտրում են կանանց հանդերձավորել ծաղկային գունագեղությամբ, հաղորդում է Lenta.Ru-ն:
Նորաձևության բազմաթիվ քննադատաները համամիտ են ԱՄՆ Նորաձև դիզայներների Խորհրդի նախագահ Դայան ֆոն Ֆարստենբերգի այս մտքին` «Մենք նորաձևությունից սպասում ենք լույս, թեթևություն և երջանկություն»: Նա այն տեսակետին է, որ պարտադիր չէ, որ նորաձևությունը վերածվի կոմերցիոն արդյունաբերության, այլ այն նոր ոգեշնչումների, լիցքերի, գաղափարների հիմք կարող է դառնալ տարբեր բնագավառներում:
BCNG դիզայներական տունն առաջարկում է կանանց հանդերձավորել քաջվարդի (պիոն) տարբեր երանգներով, Tadashi Shoji-ն դաշտային ծաղիկների գույներ է առաջարկում, Richard Chai-ն կանանց հագուստները գունավորել է երկնագույնով` ի նշան երկար սպասված գարնանը, Շեյն Գեբրիելը և Քրիս Պիտերսը նվիրում են թարմ կանաչի ամենատարբեր երանգներ` համադրված բացված վարդի երանգների հետ:
Ասիական ծագումով ամերիկացի Փիթեր Սոմը, ով իր ներկայացրած աշխատանքներով քարոզում է «մաքուր սեքսուալությունը», իր խորհրդավոր մանեկեններին հանդերձավորել է մինչև հատակ հասնող մետաքսով՝ գարնանային գույներով:
Մնում է միայն ավելացնել, որ Նյու Յորքում անցկացվող բարձր նորաձևության շաբաթը այն ցուցադրությունների հիմքն է դնում, որոնք կրկին բարձր նորաձևության խորագրի ներքո տեղի են ունենում Լոնդոնում, Փարիզում, Միլանում:
