Այսօր՝ սեպտեմբերի 8-ին, Լոռու մարզի Ախթալա քաղաքում տեղի ունեցավ արդեն ավանդական դարձած` Խորովածի չորրորդ մրցույթ-փառատոնը:
Չնայած ամպամած եղանակին, Ախթալայի Սուրբ Մարիամ Աստվածածին եկեղեցու մոտ հավաքվել էին ոչ միայն տեղի, ինչպեսև Թումանյանի տարածաշրջանի բնակիչները, այլև մեծ թվով զբոսաշրջիկներ, ովքեր հանգստանալու են եկել Հայաստան: Փառատոնին ներկա էին նաև Հայաստանում ԱՄՆ դեսպան Ջոն Հեֆերնը, ՀՀ գյուղատնտեսության նախարար Սերգո Կարապետյանը, Լոռու մարզպետ Արթուր Նալբանդյանը, հոգևոր այրեր, տեղական իշխանությունների ներկայացուցիչներ՝ Ախթալայի քաղաքապետ Հայկազ Խաչիկյանի գլխավորությամբ:
Խորովածի չորրորդ մրցույթ-փառատոնը կազմակերպել էին «Հայ խոհարարական ավանդույթների զարգացման եւ պահպանման» հասարակական կազմակերպությունը, «Արենի» փառատոն» հիմնադրամը, Ախթալայի քաղաքապետարանն ու Լոռու մարզպետարանը՝ ՀՀ էկոնոմիկայի նախարարության աջակցությամբ: Փառատոնին մասնակցում էին տարբեր պարային խմբեր, անհատ կատարողներ:
Լոռու մարզպետ Արթուր Նալբանդյանն իր ելույթում կարևորեց փառատոնի անցկացումը՝ հատկապես տուրիզմի զարգացման գործում:
Կազմակերպիչների խոսքով` փառատոնի նպատակն է հայկական խորովածը միջազգային մասշտաբով ներկայացնել որպես հայկական խոհանոցի անբաժանելի մաս: «Հայ խոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանը նշեց, որ նախորդ տարիների համեմատ այս տարի ավելի քիչ թվով ռեստորաններ ու անհատներ են մասնակցում փառատոնին, բայց իրենք կարևորել են ոչ թե մասնակիցների թիվը, այլ միջոցառման որակը:
Խորովածի չորրորդ մրցույթ-փառատոնին, բացի ավանդական խոզի խորովածից, զբոսաշրջիկների համար նորություն էր ձմերուկից, սեխից, դեղձից, սալորից, թզից և այլ մրգերից պատրաստված խորովածը:
Ի դեպ, մեկ շամփուր սովորական խորովածի գինը սկսվում էր 2500 դրամից, և վաճառքը սահմանված էր բոլորի համար՝ թե՛ զբոսաշրջիկների, թե՛ պաշտոնյաների, թե՛ տեղաբնակների:
Այս տարի Խորովածի փառատոնին մասնակցում էր 18 ռեստորան ու 5 անհատական խումբ, մինչդեռ անցած տարի՝ 2011-ին, մասնակցում էր 25 ռեստորան, ընդ որում` Հայաստանից բացի ներկայացված էին նաև ռեստորաններ հարևան Վրաստանից, այցելուների թիվը հասնում էր մոտ 15 հազարի:
