Ռեժիսոր Էնգ Լին որոշել է Թոբի Մագուայրին փոխարինել մեկ այլ դերասանով: Վերջինս պետք է խաղար «Պիի կյանքը» ֆիլմում՝ մարմնավորելով հերոսներից մեկին: Այս մասին հաղորդում է The Hollywood Reporter-ը:
«Պիի կյանքը» 2001թ. հրատարակված կանադացի գրող Յան Մարտելի վեպի էկրանավորումն է: Գրքում նկարագրվում է հնդկացի մի դեռահասի կյանքը, որը նավաբեկությունից հետո փրկարար նավակով լողում է բաց օվկիանոսով բենգալյան վագրի ու այլ կենդանիների հետ:
Մագուայրը պետք է մարմնավորեր գրողի, որը հարցազրույց է վերցնում գլխավոր հերոսից, երբ վերջինս ցամաք է հասնում:
Առկա տեղեկությունների համաձայն՝ Էնգ Լին կարծում է, որ Թոբին շատ հայտնի դերասան է ու կարող է հանդիսատեսի ուշադրությունը բևեռել իր վրա: Ներկայում գրողին մարմնավորում է Ռեյֆ Սփոլը:
Մագուայրը հայտարարել է, որ լիովին համաձայն է Էնգ Լիի որոշման հետ:
«Պիի կյանքը» վարձույթ դուրս կգա 2012թ. նոյեմբերի 21-ին:
