«Երեկվանից մեկնարկեց ՀՀ վարչապետ Տիգրան Սարգսյանի հրապարակային դատափետման և Հայաստանում տիրող իրավիճակի ողջ մեղքը նրա վրա բարդելու գործընթացը, որն իրականացվում է Սերժ Սարգսյանի մերձավորների վերահսկողության տակ գտնվող լրատվամիջոցների միջոցով: Այսինքն, կարելի է ասել, որ վարչապետի դատափետման գործընթացն իրականացվում է Սերժ Սարգսյանի բարձր հովանու ներքո: Իսկ ամեն ինչ սկսվեց այն բանից, որ իշխանական լրատվամիջոցներից մեկը երեկ մի նյութ հրապարակեց, որում քննադատել էր ԲՀԿ նախագահ Գագիկ Ծառուկյանի ՀՀ անվտանգության խորհրդի անդամ լինելու փաստը»,- գրում է «Հայկական ժամանակ»-ը և հավելում.
«Լույսը դեռ չբացված` ԲՀԿ լրատվական ծառայությունը տարածեց այս կուսակցության մամուլի խոսնակ Տիգրան Ուլիխանյանի հարց ու պատասխանը, որում վերջինս հայտարարել էր, որ Գագիկ Ծառուկյանի վերաբերյալ նյութ հրապարակած թերթի «գաղափարական և ֆինանսական հայրերը վարչապետ Տիգրան Սարգսյանն ու «Ֆլեշ»-ի Բեգլարյան Բարսեղն են»: Ըստ Ուլիխանյանի, իր ղեկավարը, այսինքն` Գագիկ Ծառուկյանը, Հայաստանի ամենաբարձր հեղինակություն ունեցող մարդն է, իսկ Տիգրան Սարգսյանն էլ ուզում է վարկաբեկել նրան, այլ կերպ ասած` վարչապետն աչքը դրել է Ծառուկյանի հեղինակության վրա: Այնուհետև ԲՀԿ մամուլի խոսնակը հանրությանն ավետել էր իշխանազն կուլիսներում շրջող լուրերի մասին, այն է` Տիգրան Սարգսյանի եղբայրը, փեսան, հորեղբայրը և մնացյալ բարեկամներն ու ֆավորիտները միայն իրավունք ունեն «շահելու» այս կամ այն տենդերը, և թե ինչպես հենց այս պահին Տիգրան Սարգսյսնի եղբոր հրահանգով ապամոնտաժվում են Մասիս-Էջմիածին հատվածի ոռոգման ջրի խողովակները` գյուղացիներին զրկելով իրենց այգիները ոռոգելու վերջին հնարավորությունից, քանզի վարչապետի եղբայրը որոշել է ՀԷԿ կառուցել, և որ շատ ավելի բաց և հրապարակային կխոսեն «Նաիրիտի» էպոպեայի մասին, Հնդկաստանից ներկրված և մեր ժողովրդին տևական ժամանակ գոմեշի սատկած միս մատակարարած իրական պատասխանատուների և շատ ու շատ այլ բաների մասին: Սի խոսքով` էլ գող փիսո, էլ քաչալ շուն, բանը հասավ դիվանբաշուն»:
Տիգրան Սարգսյանի լրատվական ծառայությունից մեկնբանություն ստանալու «ՀԺ»-ի թղթակցի բոլոր փորձերը երեկ պարդյուն անցան: Վարչապետի լրատվականի հեռախոսահամարները կեսօրից հետո անհասանելի էին: Իհարկե, որոշ ՀՀԿ-ականներ երեկ այս թեմայով հայտարարություններ արեցին. նրանք փորձում էին ԲՀԿ մամուլի քարտուղարին սաստել, ստիպել, որ լռի: Բայց սա այն դեպքերից է, որ մեղադրանքները հասցեագրված են կոնկրետ անձի` Տիգրան Սարգսյանին, և նա էլ պետք է կամ պատասխանի, կամ լռությամբ հաստատի ասվածի իսկությունը:
Ի դեպ, «Ֆլեշ» ընկերության սեփականատեր Բարսեղ Բեգլարյանը երեկ պատասխանեց ԲՀԿ մամուլի խոսնակին: Այդ պատասխանով Բեգլարյանն իր հասցեին ուղղված մեղադրանքները չէր հերքել, այլ «արժանի» հակահարված էր տվել Տիգրան Ուլիխանյանի` Գագիկ Ծառուկյանին որպես բարեգործ ներկայացնելու ջանքերին: «Ինչ վերաբերում է երկրում վարկանիշ ունենալուն և բարեգործական գործունեությանը, Բարսեղ Բեգլարյանը երբևէ չի գովազդել իր արածը` չունենալով քաղաքական առաջընթացի նպատակներ, ինչպես ունեն շատերը, ինչի համար էլ ծախսում են գրոշներ և ի լուր աշխարհի կոկորդ պատռում»,- ասել էր Բեգլարյանը:
Տիգրան Սարգսյանի մամուլի քարտուղար Հարություն Բերբերյանն ուշ երեկոյան հայտարարություն տարածեց` ազդարարելով, որ վարչապետը մտադիր չէ մեկնաբանել Տիգրան Ուլիխանյանի մեղադրանքները: Տիգրան Սարգսյանը, թերևս, բոլորից լավ գիտի, թե ով է կանգնած այս գործընթացի ետևում, և ինչ նպատակով է դա արվում, ուստի նախընտրել է լռել, գուցե ուզում է թուլանալ և հաճույք ստանալ:
Դեռևս երկու ամիս առաջ վարչապետի շրջապատի մարդիկ դժգոհում էին, թե իշխանական քարոզչության պատասխանատուները, ավելի կոնկրետ` Սերժ Սարգսյանի փեսա Միքայել Մինասյանը որոշել է նախագահական ընտրությունների զոհասեղանին դնել Տիգրան Սարգսյանին: Այդ ժամանակ նույնիսկ նշվում էր կոնկրետ ժամկետը` սեպտեմբերի երկրորդ կեսին պետք է սկսվեր Տիգրան Սարգսյանի հրապարակային դատափետման գործընթացը: Նշվում էր, որ այդ ամենն իրականացվելու էր իշխանական լրատվամիջոցների անմիջական աջակցությամբ: Բայց իրադարձությունները մի քանի օր շուտ սկսեցին զարգանալ: Տիգրան Ուլիխանյանի` վարչապետին դատափետող հայտարարությունը երեկ մի քանի ժամ շարունակ իշխանական կայքերի առաջին էջի հիմնական նյութն էր:
«Իշխանական քարոզչության պատասխանատուներն այս «օպերացիայի» միջոցով մի խնդիր են լուծելու. ԲՀԿ-ն սրտի ուզածի չափ կարող է ընդդիմադիր դիրքերից հանդես գալ` Տիգրան Սարգսյանի ու նրա կառավարությանը «քլնգելով», և որ ամենակարևորն է` երկրռւմ տիրող խայտառակ իրավիճակի միակ պատասխանատուն և մեղավորը դառնալու է Տիգրան Սարգսյանը: Իսկ Սերժ Սարգսյանը, բնականաբար, չի կրում ոչ մի պատասխանատվություն:
Ըստ այս սցենարի, փետրվարին կայանալիք նախագահական ընտրությունների քարոզչության վերջում` Սերժ Սարգսյանը և Գագիկ Ծառուկյանը միավորվելու են և հանդես են գալու որպես փրկիչներ ու միասնաբար Հայաստանն ազատելու են Տիգրան Սարգսյանի «բոբո» կառավարության ճիրաններից»,- գրում է «ՀԺ»-ն:
