ИТАР-ТАСС-ի փոխանցմամբ՝ սեպտեմբերի 16-ին Իրանի ափերի անմիջական մերձակայքում ԱՄՆ-ի գլխավորությամբ մեկնարկելու են 25 երկրների մասնակցությամբ 12-օրյա ռազմածովային զորավարժություններ: Այս մասին հայտնել են բրիտանական զինված ուժերի աղբյուրները:
Վերջիններիս հաղորդմամբ՝ այդ զորավարժությունների ժամանակ ենթադրյալ հակառակորդի թշնամական գործողությունների պայմաններում մշակվելու են Պարսից ծոցում ու Հորմուզի նեղուցում նավարկության աջակցմանն ուղղված գործողություններ: Արևմտյան երկրների շտաբներում չեն թաքցնում, որ այդ ենթադրյալ հակառակորդի դերում դիտարկում են Իրանը:
ԱՄՆ-ն այդ զորավարժություններին ներկայացված կլինի երեք հարվածային ավիակրային խմբավորումներով: Ներկայումս տվյալ տարածաշրջանում են գտնվում ամերիկյան Enterprise և Dwight Eisenhower ավիակիրները, իսկ մոտ ժամանակներս նրանց կմիանա John C.Stennis ավիակիրը:
Զորավարժությունների համար խոշոր ռազմածովային ուժեր են հատկացրել Մեծ Բրիտանիան, Ֆրանսիան, Սաուդյան Արաբիան, ԱՄԷ-ն: Զորավարժություններն ավարտվելու են սեպտեմբերի 27-ին: Նույն օրը Վաշինգտոնում տեղի կունենա ԱՄՆ նախագահ Բարաք Օբամայի ու Իսրայելի վարչապետ Բենիամին Նեթանյահուի հանդիպումը:
