Հայաստան եկավ ու գնաց ԱՄՆ պետքարտուղարի առաջին տեղակալ Ջեմս Սթեյնբերգը, որին ուղեկցում էր նաև պետքարտուղարի մեկ այլ տեղակալ Ֆիլիպ Գորդոնը:
Սակայն ԱՄՆ դիվանագիտական այս բարձրաստիճան պատվիրակության հայաստանյան այցը զարմանալիորեն բավական լուռ անցավ: Ընդամենը եղան Հայաստանի իշխանության հետ հանդիպման մասին պաշտոնական և ինչպես միշտ` բավական սուղ հաղորդագրություններ:
Մինչդեռ հազիվ թե ամերիկյան այդ կարգի բարձրաստիճան պատվիրակությունը տարածաշրջան, այդ թվում Հայաստան այցելեր առանց լուրջ օրակարգի: Հազիվ թե ընդամենը ցուցադրականության կամ ընդամենը ստուգայցի համար տարածաշրջան ժամանեին պետքարտուղարի միանգամից երկու տեղակալներ:
Ուրեմն ի՞նչն էր Հայաստանում նրանց այդ լռության պատճառը, ինչո՞ւ ամերիկյան պատվիրակությունը հանդիպում չունեցավ լրագրողների հետ, ինչն, օրինակ, արեց նախորդ տարվա հուլիսին Հայաստան ժամանած պետքարտուղար Հիլարի Քլինթոնը:
Մի՞թե Սթեյնբերգը և Գորդոնը Հայաստանի հասարակությանն ասելիք չունեին, մի՞թե նրանց օրակարգը առնչություն չուներ Հայաստանի քաղաքացիների հետ: Չէ՞ որ նրանց այցի հենց նախօրեին էր Հայաստանում ԱՄՆ դեսպանը ելույթ ունեցել Ամերիկյան համալսարանում և խոսել այն մասին, որ ԱՄՆ-ն աջակցելու է Հայաստանում քաղաքացիական հասարակության կայացմանը:
Կամ գուցե Սթեյնբերգի և Գորդոնի ասելիքը հրապարակավ ասելու բան չէր:
Իսկ գուցե այն, ինչ կապված նրանց այցի հետ պետք է ասվի հասարակությանը, նրանք համարել են իշխանության անելիք գործը: Բայց Հայաստանի իշխանությունն էլ նախևառաջ ոչ թե սեփական հասարակության հետ է կիսվում, այլ սովորության համաձայն` արևմտյան որևէ բարձրաստիճան պաշտոնյայի հետ զրույցից հետո անմիջապես վազում է Ռուսաստանի բարձրաստիճան պաշտոնյաների մոտ:
Սերժ Սարգսյանն այսօր մեկնում է Սանկտ Պետերբուրգ, որտեղ հանդիպելու է Դմիտրի Մեդվեդևին: Այնտեղ, իհարկե, նա կասի, թե ինչ է առաջարկել կամ ասել Սթեյնբերգը: Կասի նաև, թե ինչ է ինքը պատասխանել Սթեյնբերգին: Հավանական է, որ դրանից էլ կախված կլինի, թե, օրինակ, ինչ կասի Մեդվեդևը ապրիլից Հայաստանի համար սահմանվելիք գազի նոր գնի վերաբերյալ:
Այսինքն` Հայաստանի հասարակությունը բոլոր դեպքերում, ինչպես միշտ, ականատես և ունկնդիր է լինելու ոչ թե տնտեսա-քաղաքական գործընթացին, այլ ընդամենը քաղելու է դրա արդյունքը, կամ, ինչն ավելի հավանական է` ելնելով նախադեպերից, իր մաշկի վրա զգալու է դրա հետևանքը, թեկուզ և նախկինում եղած հետևանքների անփոփոխ շարունակականության տեսքով:
