Грузия Online-ի փոխանցմամբ՝ ամերիկյան սենատորների պատվիրակությունը ժամանել է Վրաստան: Պատվիրակությունը գլխավորում է սենատոր Ջոն Մաքքեյնը, պատվիրակության կազմում են գտնվում նաև Ջոզեֆ Լիբերմանն ու Լինդսի Գրեմը:
Իրենց վրացական այցի շրջանակներում սենատորները հանդիպումներ են ունենալու նախագահ Միխեիլ Սաակաշավիլիի և կառավարության անդամների, ինչպես նաև ընդդիմադիր կուսակցությունների առաջնորդների հետ:
Պլանավորված է նաև, որ սենատորները հանդիպելու են «Վրացական երազանք» կոալիցիայի առաջնորդ Բիձինա Իվանիշվիլիի հետ: Այդ հանդիպումը տեղի է ունենալու լրագրողների համար դռնփակ պայմաններում:
Այսօր մեկօրյա այցով Վրաստան է ժամանելու նաև ՆԱՏՕ-ի գլխավոր քարտուղար Անդերս Ֆոգ Ռասմուսենը: Վրաստան ժամանելուց առաջ Ռասմուսենը հայտարարել է, որ խորհրդարանական ընտրությունների մոնիթորինգը չի հանդիսանում ՆԱՏՕ-ի գործառույթը՝ դրա հետ մեկտեղ ընդգծելով, որ այս տարվա հոկտեմբերի 1-ին և հաջորդ տարվա հոկտեմբերին Վրաստանում անցկացվելիք խորհրդարանական ու նախագահական ընտրությունների անցկացումը շատ կարևոր են այդ երկրի համար:
