Դերասանուհի Անժելա Սարգսյանի անձնական կյանքին վերաբերող տեղեկությունները, այդ թվում` լուսանկարներ և տեսանյութեր, համացանցում տարածելու մեջ մեղադրվող նրա նախկին զուգընկեր Կարեն Արայանի դատավարությունը մոտենում է ավարտին: Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում վերջապես ավարտվել է դատարան այդքան երկար ձգձգումներից հետո ներկայացած վկաների հարցաքննությունը, և այդպիսով դատարանն արդեն անցել է մեկ այլ դատավարական փուլի` գործով հայտնի ապացույցների հետազոտմանը:
Կարեն Արայանի պաշտպան Կիմա Սարյանը «Առաջին լրատվական»-ի հետ զրույցում նշեց, որ դատարանը, ամենայն հավանականությամբ, մոտ երկու նիստ հետո արդեն կհրապարակի գործով դատավաճիռը:
Նշենք, որ աղմկահարույց դատավարությունը շարունակական ձգձգումներից հետո վերջապես սկսեց ընթացք ստանալ Կարեն Արայանի կողմից հայտարարված հացադուլի դադարեցումից հետո: Մոտ երկու ամիս առաջ էր դերասանուհու զուգընկերը «Նուբարաշեն» ՔԿՀ-ում անժամկետ հացադուլ հայտարարել` քրեական գործից ունեցած բողոքն արտահայտելով:
Կարեն Արայանը ՀՀ նախագահին, գլխավոր դատախազին, Մարդու իրավունքների պաշտպանին, արդարադատության նախարարին և ԱԺ նախագահին ուղղված բաց նամակ էր հղել բանտից, որում մասնավորապես նշվում էր. «Ես` Կարեն Արայանս, անհիմն մեղադրվում եմ դերասանուհի Անժելա Սարգսյանի պոռնկագրական բնույթի լուսանկարը տարածելու և նրա ընտանեկան գաղտնիքը բացահայտելու մեջ, այսինքն` ՀՀ Քրեական օրենսգրքի 263-րդ հոդվածի 1-ին մասով և 144-րդ հոդվածով: Ողջ մեղադրանքը հիմնված է շինծու ապացույցների և ոչ ճիշտ որակված փաստերի վրա: Ես պնդում եմ, որ այդ արարքը կատարել է հենց ինքը` Անժելա Սարգսյանը, սակայն մինչ այսօր չի ստուգվել նույնիսկ նրա համակարգիչը… Ես ինձ մեղավոր չեմ ճանաչել ու չեմ ճանաչում, քանի որ ես ոչ մի պոռնկագրական բնույթի լուսանկար ոչ մեկին, ոչ մի կերպ չեմ փոխանցել ու չեմ ցուցադրել»:
«Արմենիա» հեռուստաընկերության եթերով հեռարձակված «Ուր է իմ տղամարդը» հեռուստասերիալի աշխատակիցներն ու դերասանական կազմի որոշ անդամները, որոնք դատարանի կողմից դատակոչված վկաների թվում էին, փաստորեն, արդեն հարցաքննվել են:
Գործով հաջորդ` սեպտեմբերի 27-ի նիստում դատարանը կհետազոտի քրեական գործում առկա ապացույցները:
