ԱԺ կանոնակարգ-օրենքում նախատեսվում են փոփոխություններ, ըստ որի` ԱԺ պատգամավորը չպետք է վարձատրվող այլ աշխատանք ունենա՝ բացի գիտամանկավարժական գործունեությունից:
«Ժառանգությունից» Արմեն Մարտիրոսյանը կարծիք հայտնեց, որ ամեն անգամ, երբ հանրապետության նախագահի հետ կազմակերպվում է խոշոր գործարարների հանդիպում, պարզվում է, որ նախագահական նստավայր գնացածների մեծ մասը պատգամավորներ են:
Երբ լրագրողները ԱԺ փոխխոսնակ, Գյումրու գարեջրի գործարանի սեփականատեր Սամվել Բալասանյանին այդ մասին հարց տվեցին, վերջինս ասաց. «Ձեր հարցի իմաստն այն է, որ իրավունք չունի: Ունի, չէ ՞, ամեն քաղաքացի սեփականության իրավունք…»: ԲՀԿ խմբակցության քարտուղար Արամ Սաֆարյանի հուշումից հետո ավելացրեց` «կառավարելու»: Արամ Սաֆարյանն էլ իր հերթին ասաց, «Մենք ոչ թե սկզբունքներին ենք երբևէ դեմ լինելու, որովհետև սկզբունքը սահմանադրական է և մեզ համար հասկանալի, այլ մենք աշխատելու ենք այդ փաստաթղթի վրա այնպես, որ նա չստեղծի ծայրահեղություններ, որոնք չկան միջազգային պրակտիկայում: Մենք պնդելու ենք, որ այդ փաստաթուղթը ամբողջապես համահունչ լինի Եվրոպայի խորհրդի տարածքում գործող նմանատիպ օրենքներին և մոտեցումներին. դրանից ո՛չ ավել, ո՛չ էլ պակաս»:
