Հունգարիայի կառավարության կողմից Ռամիլ Սաֆարովին արտահանձնելը կարևոր թեստ է միջազգային հանրության համար. այսօր լրագրողների հետ հանդիպմանն ասաց քաղաքագետ, տարածաշրջանային հետազոտությունների կենտրոնի ղեկավար Ռիչարդ Կիրակոսյանը` նշելով, որ Հայաստանը այս խնդրի արդյունքում կհասկանա, թե որ երկիրն ինչ քաղաքականություն ունի: Արդյունքում, ըստ Կիրակոսյանի, եթե միջազգային հանրությունը կտրուկ գնահատական չտա այս ամենին, Հայաստանը պետք է հայտարարի, որ վերանայում է իր քաղաքականությունը Եվրամիության և ՆԱՏՕ-ի հետ համագործակցության հարցում: «Երևանն ամեն ինչ արել է, մենք սպասում ենք Բրյուսելի պատասխանին»,- ասաց նա:
Ըստ Ռիչարդ Կիրակոսյանի` ՆԱՏՕ-ի գլխավոր քարտուղարի` Հայաստան կատարելիք այցի շրջանակներում Հայաստանի նախագահը պետք է շեշտի, որ ՆԱՏՕ-ի ծրագրի շրջանակում է սպանվել հայ սպան, որ ՆԱՏՕ-ն չկարողացավ ապահովել Գուրգեն Մարգարյանի անվտանգությունը: «Սպասում ենք ՆԱՏՕ-ի քննադատություններին` ուղղված Ադրբեջանին»,- ասաց նա:
Կիրակոսյանի ասելով` խելացի քայլ կլինի, եթե Հայաստանը դուրս գա ղարբաղյան բանակցային գործընթացից: Ըստ քաղաքագետի՝ պետք է ասել. հասկանալով Ադրբեջանի նման պահվածքը` Հայաստանն անիմաստ է համարում շարունակել բանակցությունը Մինսկի խմբի շրջանակներում:
Բացի այդ, Հայաստանը պետք է մտածի Արցախի անկախությունը ճանաչելու մասին, ինչպես նաև պահանջի, որպեսզի այլ երկրներ նույնպես ճանաչեն: Իսկ տեղի ունեցածի արդյունքում ամենավտանգավոր դիտարկումն այն է, որ, ըստ Ռիչարդ Կիրակոսյանի, հավանական է պատերազմի վերսկսումը:
«Միջազգային հանրությունը պետք է ամեն ինչ անի, որպեսզի Ադրբեջանը հասկանա, որ նման սադրանքի համար պետք է վճարի: Երբ տեսնում ենք Ադրբեջանի քաղաքական և դիվանագիտական պրովոկացիաները, հասկանում ենք, որ Ադրբեջանը պատրաստ է ամեն ինչի, նույնիսկ պատերազմ սկսելուն` շատ լավ հասկանալով, որ կպարտվի: Այս պահին կարող ենք ասել, որ Ադրբեջանը շատ վտանգավոր և անկանխատեսելի թշնամի է, մի երկիր է, որը խրախուսում է ատելությունն ու սպանությունը»,- ասաց նա:
Ռիչարդ Կիրակոսյանը նաև նշեց, որ միջազգային հանրությունը պետք է պատժի Ադրբեջանին, որովհետև այդ երկիրը ոչ միայն Հայաստանի համար է վտանգ ներկայացնում, այլև միջազգային հանրության:
Տեղի ունեցածը, ըստ քաղաքագետի, խոսում է Ադրբեջանի բանակի մակարդակի մասին: Սա ցույց է տալիս, որ ադրբեջանական բանակը խրախուսում է սպանությունները և մասնավորապես՝ քնած մարդուն կացնահարելը:
Ռիչարդ Կիրակոսյանը հատկանշական համարեց այն, որ ԱՄՆ-ն առաջինը արձագանքեց տեղի ունեցածին: «Շատ արագ և ուժեղ ձևակերպումներ էին: Սա, իհարկե, զիլ ձայն է այն պարագայում, երբ ոչինչ չենք լսում Մոսկվայից»,- ասաց նա` ընդգծելով, որ այս իրադարձությունը ցույց կտա, թե որքանով է Ռուսաստանը Հայաստանի ռազմավարական գործընկերը:
Ռիչարդ Կիրակոսյանի խոսքով` Հունգարիան գնաց այս որոշմանը Ադրբեջանից բնական գազ և ֆինանսական աջակցություն ստանալու համար: «Ադրբեջանն ասել է` դու մի մտածիր այդ մասին, մենք քննադատությունը մեր վրա կվեցնենք: Ադրբեջանն անկեղծ ասել էր, որ Բուդապեշտում դեսպանատուն բացելու պատճառը Սաֆարովին հետ բերելն էր»,- ասաց նա:
Ըստ Կիրակոսյանի` Հայաստանի ԱԳՆ-ն պետք է շատ լավ կանխատեսեր սա և պատրաստված լիներ: Սա ցույց է տալիս, որ Հայաստանում կա մի մեծ խնդիր` չի պլանավորվում անսպասելին:
Քաղաքագետը նաև ընդգծեց, որ Սաֆարովին արտահանձնելու որոշումը Ադրբեջանի նախագահի և Հունգարիայի վարչապետի անձնական որոշումն է եղել: Հունգարիայի արտաքին գործերի և պաշտպանության նախարարները, Կիրակոսյանի կարծիքով, այս որոշման հետ կապ չեն ունեցել: Քաղաքագետը նաև նշեց, որ Հունգարիայի կատարած քայլն ամոթալի է ոչ միայն այդ երկրի, այլև Եվրամիության համար:
