Ռուսաստանի արտգործնախարար Սերգեյ Լավրովը և ԱՄՆ պետքարտուղար Հիլարի Քլինթոնը Վլադիվոստոկում Ասիախաղաղօվկիանոսյան տնտեսական համագործակցության գագաթաժողովի շրջանակներում պատրաստվում են քննարկել Սիրիայի հարցը:
«Սկզբունքային մակարդակով Ռուսաստանի և ԱՄՆ-ի դիրքորոշումները չեն հակասում միմյանց: Ե՛վ մենք, և՛ նրանք արդյունքում միևնույն բանն ենք ցանկանում` Սիրիայի անցում ժողովրդավարական, պլյուրալիստական համակարգի, որը կիրականացվի հենց սիրիացիների կողմից՝ բոլորի կողմից այդ երկրի ինքնիշխանությունը, անկախությունը, միասնությունը և տարածքային ամբողջականությունը հարգելու պայմաններում»,- РИА Новости-ին տված հարցազրույցում ասել է նախարարը:
Ասիախաղաղօվկիանոսյան տնտեսական համագործակցության ֆորումը տեղի է ունենում Վլադիվոստոկում սեպտեմբերի 2-9-ը: ԱՄՆ նախագահ Բարաք Օբաման դրան չի մասնակցում. գագաթաժողովին ԱՄՆ-ը ներկայացնում է պետքարտուղար Հիլարի Քլինթոնը:
Լավրովի խոսքով` երկու երկրների դիրքորոշումների տարբերությունն այդ նպատակին հասնելու մոտեցումների մեջ է:
«Ամերիկացիների համար կարևորը իրադարձությունների ընթացքը նախապես սահմանելն է, Բաշար Ասադին հեռացնելը և անցումային կառավարություն ստեղծելը՝ այդ բոլոր հարցերը համաձայնեցնելով առանց Սիրիայի ներկա իշխանությունների մասնակցության, այսինքն` փաստացիորեն պարտադրելով կարգավորման ծրագիր դրսից»,- ասել է Լավրովը:
Ի տարբերություն դրա՝ Ռուսաստանը, Լավրովի խոսքով, առաջարկում է առաջնորդվել Ժնևի պայմանավորվածությամբ, որի համաձայն հակամարտող կողմերը պետք է դադարեցնեն կրակը և նշանակեն լիազորված բանագնացներ: «Մնացած ամեն բան պետք է լուծվի բանակցությունների սեղանի շուրջ՝ սիրիացիների կողմից: Նրանց երկրի ապագայի շուրջ հարցերի էության վերաբերյալ որևէ բան թելադրելը մենք համարում ենք հակաարդյունավետ: Չնայած հազիվ թե դրսից փաթաթված կարգավորումը կարողանա կայուն լինել»,- ասել է նա:
