Փավստոս Բուզանդի փողոցից հարկադրաբար տեղահանված բնակիչները Սերժ Սարգսյանին են ուղարկել հերթական նամակը, որի կրկնօրինակը փոխանցել են մեզ։ Նամակում ասվում է.
«Ձեզ ենք դիմում պետական շահերի համար իրենց բնակարանները բռնի ձևով զոհաբերած Փավստոս Բուզանդի բնակիչներս։
Շուտով կլրանա 6-րդ դաժան տարին, երբ մենք դարձանք անօթևան, մոռացված մի զանգված, որոնք չունեն ոչ ընտրության, ոչ անձնագրերի ժամկետը երկարացնելու, ոչ զինակոչիկից պահանջվող տեղեկանք բնակավայրից ստանալու իրավունք, քանզի մենք չունենք հասցե։
Հաճախակի բարձր ամբիոններից հնչում են մարդու իրավունքների պաշտպանների ձայներ, որոնք մնում են ձայն բարբարո հանապատի։
Դուք ձեր նախընտրական ելույթներում խոստացաք հետևողական լինել և դրական լուծում տալ անօթևանների հարցին, սակայն դա մատնվեց լռության։ Զայրույթի, վիրավորանքի, բարոյական, նյութական և ֆիզիկական համբերության բաժակը լցվել է, բայց ասում են՝ հույսը վերջինն է մահանում։
Այդ հույսը դուք եք, գուցե դուք հիշեք և կատարեք ձեր խոստումը՝ տալ մեզ առաստաղ մեր գլխավերևում և վերջ տալ այս ամոթալի երևույթին, երբ մենք մեր հայրենիքի քաղաքացիները չենք»,- ասվում է Սերժ Սարգսյանին ուղղված նամակում։
