Էստոնիայի արտգործնախարար Ուրմաս Պաետը հայտարարել է, որ սահմանների մասին ՌԴ ԱԳ նախարար Սերգեյ Լավրովի հայտարարության մեջ ոչ մի նոր բան չկա:
«Ռուսական կողմը տարիներ շարունակ խոսում է այն մասին, որ հարկավոր է վերստին սկսել սահմանների մասին բանակցությունները, այն դեպքում երբ Էստոնիայի խորհրդարանը վավերացրել է այդ պայմանագրերը դեռևս 2005թ.: Ես չգիտեմ, թե ինչ համատեքստում է Լավրովը շոշափել այս թեման»,- ասել է Պաաետը BNS գործակալությանը:
Պաետը հիշեցրել է, որ Էստոնիայի և Ռուսաստանի միջև սահմանների հարցերի շուրջ պայմանագիրը կնքվել է 11 տարի առաջ:
Նա նաև նշել է, որ վավերացման մասին որոշման մեջ ռուսական խորհրդարանը ևս ավելացրել է իր տեսակետը:
Ավելի վաղ ՌԴ արտգործնախարար Սերգեյ Լավրովը հայտարարել էր, որ Մոսկվան պատրաստ է բանակցել Տալինի հետ սահմանների մասին նոր պայմանագրի կապակցությամբ:
«Էստոնիայի հետ մենք ստորագրել ենք պայմանագիր սահմանների մասին ու հստակ ֆիքսել ենք, որ չպետք է լինի տարածքային հավակնությունների կրկնություն, որ Էստոնիան ունեցել է Ռուսաստանի Դաշնության նկատմամբ անցած դարի 20-ականներին, այսպես կոչված, Տարտուի պայմանագրի շրջանակում»,- ասել է նա` ելույթ ունենալով ուսանողների առաջ:
«Մեր էստոնացի գործընկերները վստահեցրել են, որ հավակնություններ չեն ունենա, որ այդ պայմանագիրը վերջնականապես «կփակի» սահմանային թեման, սակայն երբ այդ պայմանագիրը վավերացման համար ներկայացվեց Էստոնիայի խորհրդարան, խորհրդարանը վավերացման օրենքում հիշատակեց Տարտուի պայմանագիրը, ընդ որում` այն ենթատեքստով, որում պահպանվում էին հավակնությունները ՌԴ նկատմամբ»,- ասել է Լավրովը:
