«Գաղափարական աչքակալները», որոնք հաճախ սահմանափակում են արևմտյան քաղաքական գործիչների աշխարհայացքը, չեն խանգարում Ռուսաստանին: Այս մասին հայտարարել է Ռուսաստանի արտգործնախարար Սերգեյ Լավրովը՝ ՄԳԻՄՕ-ի ուսանողների հետ ամենամյա հանդիպմանը:
Ինչպես հաղորդում է ITAR-TASS-ը, Լավրովը հիշեցրել է, որ Ռուսաստանի նախագահ Վլադիմիր Պուտինն ավելի վաղ հայտարարել էր, որ «համաշխարհային գործերում Ռուսաստանի դրական, հավասարակշռված դերը գնալով ավելի պահանջված է դառնում»:
«Դա թույլ է տալիս ավելի ակտիվորեն ազդել միջազգային իրավիճակի վրա, ավելի արդյունավետ կերպով պնդել Ռուսաստանի շահերը»,- ասել է նախարարը՝ հավելելով, որ դրա համար պետք է պատրաստ լինել իրավիճակի զարգացման ամեն հնարավոր տարբերակի:
Լավրովը նաև ընդգծել է համաշխարհային զարգացման ուղիներ փնտրելու հարցում Ռուսաստանի տարած զգալի վերլուծական աշխատանքը: «Եվ այստեղ, ինչպես ներկայացվում է, մենք որոշակի առավելություն ունենք, քանի որ ազատ ենք գաղափարական աչքակալներից, որոնք հաճախ սահմանափակում են մեր արևմտյան գործընկերների աշխարհայացքը»,- ասել է նա:
