Գյումրիում նորմալ, քաղաքակիրթ ընտրապայքար չի ընթանում: Այս մասին «Առաջին լրատվական»-ի թղթակցի հետ զրույցում նշեց ՀՅԴ ներկայացուցիչ, Գյումրու ավագանու անդամ Արա Նախշքարյանը:
Վերջինս երկու օր առաջ հայտնաբերել է, որ քաղաքի տարբեր հատվածներում փակցրած իր նախընտրական պաստառները պատռել են:
«Կիրովի և Տարտու փողոցներում փակցրած իմ պաստառները չկան, ինչ-որ անհայտ մարդիկ ուղղակի ճղել տարել են: Մի քանի պաստառների վրա էլ ավագանու որոշ թեկնածուներ բերել իրանց պաստառներն են փակցրել»,- «Առաջին լրատվական»,-ի թղթակցի հետ զրույցում նշեց ավագանու անդամության թեկնածու Արա Նախշքարյանը:
«Անի թաղամասում ընդհանրապես չկա, մաքրել-տարել են իմ պաստառները, երևի շատերը հասկացան, որ իմ շանսերը այսօր ավելի բարձր են, և ցանկանում են ամեն կողտոտ ձև օգտագործել, որ ինձ կորցնեն»,- նշեց ավագանու թեկնածուն:
Նշենք, որ այս օրերին Գյումրին «պաստառապատվել է»: Քաղաքի բոլոր գործող ու չգործող օբյեկտների` անգամ սգո ծառայություններ մատուցող օբյեկտների վրա կարելի է հանդիպել այս կամ այն թեկնածուի լայն ժպտացող դեմքով պաստառը: Նրանք անգամ մրցում են իրենց կարգախոսներով, փորձելով գյումրեցիներին գրավել սրտաճմլիկ արտահայտություններով, փորձելով համոզել, որ հենց իրենք են լավագույնը, և արժանի զբաղեցնել Գյումրու ավագանու «պատվավոր տիտղոսը»:
