Թերթի փոխանցմամբ, վերջերս իսրայելցի եւ թուրք գիտնականների, լրագրողների եւ քաղաքական գործիչների մասնակցությամբ ռազմավարական հետազոտությունների միջազգային կազմակերպությունում (USAK) տեղի է ունեցել մամուլի ասուլիս, որտեղ մասնակիցները կարծիք են հայտնել, թե թուրք-իսրայելական հարաբերությունները դեռ չեն հասել այն կետին, երբ վերադարձ այլեւս չկա, սակայն հենց այդ հարաբերությունների հետ են կապված շատ զարգացումներ տարածաշրջանում: USAK-ի ղեկավարն է պաշտոնաթող դեսպան, «Խաղաղության նավատորմի» միջադեպի առիթով ՄԱԿ-ի գլխավոր քարտուղար Պան Գի Մունի կողմից ստեղծված հանձնաժողովի անդամ Օզդեմ Սանբերքը:
Սանբերքը նշել է, որ հարաբերությունները դեռ կարող են շարունակություն ունենալ, բայց դրանք մեծապես կախված են փոխվստահությունից: Նա հայտարարել է, որ Թուրքիան երկար տարիներ շարունակ աջակցել է Իսրայելին իր բարդ տարածաշրջանային խնդիրներում` ջանքեր գործադրելով Մերձավոր Արեւելքում խաղաղություն հաստատելու ուղղությամբ: Նա նույնիսկ մոտ է եղել դրան 2008թ., երբ միջնորդություն էր անում Իսրայելի եւ Սիրիայի միջեւ: Սակայն, Սանբերքի կարծիքով, Իսրայելն այլ կերպ վարվեց եւ հարձակվեց Գազայի վրա:
Նրա խոսքերով, երկկողմ հարաբերությունների վրա լուրջ ազդեցություն է ունեցել «Խաղաղության նավատորմի» հետ կապված միջադեպը: Դրանից հետո Թուրքիայի նկատմամբ որոշակի դժգոհություններ առաջացան այն կապակցությամբ, որ նա թեքվել է դեպի Արեւելք: Սակայն, ըստ Սանբերքի, դա այդպես չէ: Թուրքիան արագ փոփոխվող երկիր է` արձանագրել է արագ տնտեսական աճ, ինչը թույլ է տվել հանդես գալ որպես տարածաշրջանային գերտերություն: «Մեր գործընկերները պետք է նայեն Թուրքիային իր ողջ ծավալների մեջ»,- ասել է բանախոսը: նա իսրայելական եւ թուրքական կողմերին կոչ է արել «տեսնել համատեղ գործելու հնարավորությունները, քանի որ նրանք նույն դաշտում են եւ ունեն նույն ճակատագիրը, իսկ խաղադրույքներն էլ մեծ են, եւ կորցրած հնարավորությունների ժամանակն էլ ավարտվել է»:
Թել-Ավիվի Տնտեսական համագործակցության հիմնադրամի գլխավոր տնօրեն Յաիր Հիրշֆելդն իր հերթին հայտարարել է, որ Թուրքիան Մերձավոր Արեւելքի կարեւոր դերակատարներից մեկն է, հատկապես` մի քանի կարեւորագույն հարցերում, որոնցից Թուրքիայի եւ Սիրիայի ջերմ հարաբերություններն են, եւ դրանով իսկ Թուրքիան կարեւոր միջնորդական առաքելություն կարող է ունենալ իսրայելա-սիրիական հարաբերություններում: Ըստ Հիրշֆելսի` Թուրքիան կարող է նաեւ աջակցել Պաղեստինում պետականաշինությանը: Իսրայելն ու արաբական երկրները շատ տարբերություններ ունեն խաղաղության գործընթացի կողմերի ընկալումների մեջ, եւ Թուրքիայի դերակատարությունն այս հարցում էլ կարող է մեծ լինել:
