«Չկա այդպիսի բան, մենք պայքարել ենք Ղարաբաղի համար, ո՞վ է այդպիսի հարց դրել: Դա իշխանությունների առաջ քաշած կեղծ հարցն է, որի մեջ կեղծիք կա, ինչպես նրանց առաջ քաշած բոլոր հարցադրումների մեջ»,- անդրադառնալով Ղարաբաղ, թե Հայաստանում ժողովրդավարություն հաստատելու խնդիրներին, «Առաջին լրատվականի» հետ զրույցում կարծիք հայտնեց «Ղարաբաղ» կոմիտեի անդամ Սամվել Գևորգյանը:
Գևորգյանի գնահատմամբ, ժողովրդավարության կայացման դեպքում ժողովուրդն ամբողջ ուժով կպաշտպանի իշխանություններին, որպեսզի Ղարաբաղը չտրվի:
Անդրադառնալով ՀԱԿ համակարգող Լևոն Զուրաբյանի վերջին հարցազրույցում արտահայտած այն մտքին, թե «սերունդները մեզ չեն ների, եթե Հայաստանում ժողովրդավարություն հաստատենք Ղարաբաղի գնով», Գևորգյանը նշեց, թե դա ասել է Սերժ Սարգսյանը, իսկ Լևոն Զուրաբյանը փորձել է մեջբերել նրա խոսքերը. «Երևի տեքստից կտրված է եղել, դրա համար էլ տարօրինակ է թվում»:
Սամվել Գևորգյանը նաև հավելեց, թե այս իշխանությունները Ղարաբաղն արդեն տվել են, այդ պատճառով էլ Արևմուտքը պաշտպանում է այս «բռնապետիկներին», պահում է նրանց իշխանությունը, որպեսզի նրանց խոստացածը ստորագրության վերածվի, ինչից հետո Արևմուտքին պետք չի լինի ո՛չ Սերժ Սարգսյանը, ո՛չ հայկական պետությունը:
Սամվել Գևորգյանը նշեց, որ իրենց հիմնական նպատակն այն է, որ իշխանափոխություն լինի, որպեսզի այս իշխանությունները Ղարաբաղը չտան:
