Արևելյան գործընկերության ձևաչափի Եվրանեսթ խորհրդարանական վեհաժողովը հնարավորություն չի տվել Բելառուսի պատվիրակությանը մասնակցել վեհաժողովի նիստերին:
Եվրանեսթում հայաստանյան պատվիրակության ղեկավար Վահան Հովհաննիսյանը լրագրողների հետ հանդիպման ժամանակ նշեց, որ հիմնական պատճառն այն է, որ Բելառուսը չի համապատասխանում Եվրոպայի կողմից հայտարարված ժողովրդավարական չափանիյշներին:
Այդուամենայնիվ, ըստ Հովհաննիսյանի, Բելառուսի նկատմամբ երկակի ստանդարտներ են կիրառում և Հայաստանի պատվիրակությունը կողմ է Բելառուսի մասնակցությանը:
Վահան Հովհաննիսյանի խոսքերով, ժողովրդավարության տեսանկյունից Ադրբեջանը ևս չի համապատասխանում հայտարարված չափանիշներին, սակայն նրա մասնակցությունը ընդունվել է: Հովհաննիսյանի գնահատմամբ, պատճառը նավթն է. «Միգուցե այն պատճառով, որ Բելառուսը նավթ չունի՞»:
Հովհաննիսյանը նաև հավելեց, որ Եվրանեսթում չափանիշներից մեկն էլ այն է, որ այնտեղ կարող են ներկա լինել այն երկրները, որոնք հավանականություն ունեն ԵՄ անդամ դառնալուն:
