Այսօր «Ժողովրդական» կուսակցության նախագահ Տիգրան Կարպետյանից փորձեցինք ճշտել, թե ինչպես է վերաբերում կոալիցիայի կողմից հուշագրի ստորագրմանը, ինչին ի պատասխան արձագանքեց.
«Որպես իշխանության ամբողջովին ուզուրպացում։ Հասկանո՞ւմ եք, Սահմանադրությունը ճանաչում է բազմակարծություն, բազմակուսակցություն։ Եթե ոչ թե ժողովրդի, այլ ուժային լծակների փողը, բիրտ ուժը միավորվում է, ուրեմն, իրենք իրար հետ չեն մրցակցելու։ Իսկ ուզուրպացվելով իրենք գուցե խորհրդարանում ընդհանրապես չեն ցանկանում ընդդիմություն տեսնել։ Ես դրան շատ բացասական եմ վերաբերվում»։
Այն դիտարկմանը՝ սա քաղաքական կա՞մք էր կուսակցությունների կողմից, թե՞ սպառնալիքների և քաղաքական պարտադրանքի արդյունք, Տ. Կարպետյանը պատասխանեց.
«Դա իրենց խճճվածություն է։ Գիտեք, չէ՞, որ օձերը գարնանը խճճվում են։ Ես լուրջ եմ ասում։ Դե, իրենք խճճվում են, գարուն է եկել։ Ես հասկանում եմ, որ դուք նկատի ունենք, թե ԲՀԿ-ն որոշակիորեն իր կամքից դուրս քայլ գործեց այդպես, և մենք ակնկալում էինք ի սկզբանե, որվհետև՝ հո չի՞ կորցնելու իր բիզնեսը, որը շատ է, տարածված է։
Ինքը չի էլ տիրապետում այդ ամենին, հետևաբար, չի կարող տակից դուրս գալ։ Այնպես որ, կամ-կամ պետք է լիներ, և այդ ամենը արեցին ի վնաս ժողովրդի»։