«Կրասնոդար»-ի և Հայաստանի ազգային հավաքականի 25-ամյա հարձակվող Յուրա Մովսիսյանը կարող է լքել Սլավոլյուբ Մուսլինի թիմը` 14 մլն եվրոյի դիմաց: Ակումբի ղեկավարները նման որոշում են կայացրել, երբ հայտնի է դարձել, որ հարձակվողի ծառայություններով հետաքրքրված են ԲԿՄԱ-ն և «Դինամո»-ն:
«Անշու´շտ, Մովսիսյանը Ռուսաստանի առաջնության ամենալավ ռմբարկուներից է: Այդ կապակցությամբ ակումբի ղեկավարությունը շատ բարձր է գնահատում ֆուտբոլիստին, սակայն համապատասխան առաջարկի դեպքում պատրաստ է հրաժարվել նրա ծառայություններից: Մովսիսյանի տրանսֆերի դիմաց 14 մլն եվրոն ակումբի ղեկավարները բավական են համարում: Պաշտոնապես որևէ առաջարկ մենք դեռևս չենք ստացել:
Յուրան արդյունավետ ֆուտբոլ է ցուցադրում և, բնականաբար, նրա ծառայություններով շատ ակումբներ են հետաքրքրված: Պաշտոնական առաջարկներ ստանալուն պես մենք կսկսենք դրանց ուսումնասիրությունը»,- հայտնել է կրասնոդարյան ակումբի մամլո խոսնակը:
«ТД»-ի տեղեկությունների համաձայն` Յուրայի ծառայություններով հետաքրքրվում են եվրոպական և ռուսական մի շարք ակումբներ:
Հիշեցնենք, որ Ռուսաստանի առաջնության առաջին իսկ հանդիպումներից Մովսիսյանը դարձել է թիմի իսկական առաջատար և հիմնական կազմի անփոխարինելի ֆուտբոլիստ: Հայաստանի հավաքականի հարձակվողը մեկնարկային 6 հանդիպումներում 6 գոլ է հեղինակել:
