Երևանում անտուն շների քանակի վերաբերյալ ճշգրիտ տվյալներ չկան, սակայն, ինչպես «Առաջին լրատվական»-ին տեղեկացրին Երևանի քաղաքապետարանի աշխատակազմի տեղեկատվության և հասարակայնության հետ կապերի վարչությունից, քաղաքապետարանի կողմից ձեռնարկվում են հնարավոր բոլոր միջոցները անտուն շներից բնակչության անվտանգությունը և հանգիստն ապահովելու ուղղությամբ։
«Սրա փոխարեն, Երևան քաղաքին հարակից մարզերում չեն իրականացվում թափառող կենդանիների վնասազերծման ծրագրված աշխատանքներ, ուստի այնտեղից մշտապես Երևան քաղաք են թափանցում մեծ քանակությամբ շներ և բազմանում են։ Հենց այդ տարածքներում էլ դրանց թվաքանակը համեմատաբար շատ է»,- նշեցին վարչությունից:
«Փրկենք կենդանիներին» բարեգործական հասարակական կազմակերպության նախագահ Նունե Մեհրաբյանը «Առաջին լրատվական»-ի հետ զրույցում ասաց, որ քաղաքապետարանի այն մեկնաբանությունը, թե մարզերից են շները գալիս, անհեթեթություն է. «Անհնար է, որ մարզերից շներ գան, իրենք պարզապես ուրիշ պատասխան չունեն»:
Նա ասաց, որ արդեն շուրջ յոթ տարի է, ինչ քաղաքապետարանը զբաղվում է անտուն շներով, սակայն ապարդյուն: Շների քանակը չի նվազում ոչ մի կերպ, քանի որ չկա ճիշտ մասնագիտական մոտեցում, չի եղել արդյունավետ պայքար: Նա նշեց նաև, որ իրենք ստերլիզացրել են հարյուրավոր շների, սակայն քաղաքի փողոցներում այդպես էլ չեն տեսել այդ կենդանիներին. «Ստերիլիզացված շները վզկապ ունեն, սակայն միևնույն է՝ քաղաքապետարանը որսում է դրանց ևս: Ի՞նչ իրավունք ունեն քաղաքացու անդորրը խախտել գիշերը շներին գնդակահարելով: Իրենք հերքում են, բայց մենք ունենք ապացույցներ՝ ձայնագրություններ, գործերն այժմ դատախազությունում են, մենք բողոք ենք ներկայացրել, որ այս հարցը, վերջապես, լուծում գտնի, թե ուր է կորչում տարեկան 180 մլն դրամը արդեն վեց տարի, և թե ինչու քաղաքում մենք չենք տեսնում քաղաքապետարանի կողմից ստերիլիզացված ոչ մի շուն»:
Նունե Մեհրաբյանը մեզ տեղեկացրեց, որ օրերս Մաշտոցի պուրակում մի շուն էին ստերլիզացրել և թողել իր տեղում, սակայն եկել էին՝ շանը տանելու. «Ինձ Երեւանի քաղաքապետարանի առեւտրի վարչության պետի տեղակալ Արման Ենգոյանը հեռախոսազրույցում պարզ ասաց, որ քաղաքում ոչ մի շուն չպիտի լինի»:
Նա հավելեց նաև, որ փոխքաղաքապետ Կամո Արեյանի պահանջն է եղել նաև հավաքել կենտրոնի բոլոր շներին, տանել. «Պրն Մարգարյանն էլ երևի այն կարծիքին է, որ եթե փողոցում իրականացվում է կանաչապատում, շներին կարելի է վերացնել: Սակայն շունը, որպես սանիտար, անհրաժեշտ է քաղաքին, իսկ ստերիլիզացված շունը ոչ ագրեսիա ունի, ոչ էլ կարող է բազմանալ»:
Նշենք, որ «Փրկենք կենդանիներին» «բարեգործական հասարակական կազմակերպությունը միակն է, որը անտուն կենդանիների համար ստեղծել է կացարան, զբաղվում է շների ստերիլիզացմամբ և բուժմամբ: Այնտեղ կա շուրջ 200 շուն:
Ի դեպ, «Առաջին լրատվական»-ին քաղաքապետարանից տեղեկացրին, որ Երևանում շների ստերիլիզացումը իրականացնում է նաև բաց ընթացակարգով հայտարարված մրցույթում հաղթող ճանաչված «Յունիգրաֆ-Իքս» ՍՊԸ-ն, որը շների ամլացումը կատարում է պարբերաբար:
