Իսրայելի արտգործնախարար Ավիգդոր Լիբերմանը Եգիպտոսի նախագահ Մուհամեդ Մուրսիին հրավիրել է Երուսաղեմ: Այս մասին հաղորդում է Reuters գործակալությունը:
«Հուսով ենք, որ Մուրսին մոտ ապագայում կընդունի Իսրայելի պաշտոնական ներկայացուցչին: Մենք ցանկանում ենք, որ նա հարցազրույց տա իսրայելական ԶԼՄ-ներին: Ցանկանում ենք Մուրսիին տեսնել Երուսաղեմում` որպես Իսրայելի նախագահ Շիմոն Պերեսի հյուր»,- ասել է Լիբերմանը:
Նշենք, որ Իսրայելի արտգործնախարարը գլխավորում է «Մեր տունն Իսրայելն է» ազգայնական կուսակցությունը և հայտնի է կոշտ հակաարաբական հռետորաբանությամբ:
Լիբերմանի հրավերքը արձագանքն է վերջերս Մուրսիի արած այն հայտարարության, որում նա հաստատել է Իսրայելի հետ 1979 թվականի խաղաղ համաձայնագիրը պահպանելու Եգիպտոսի ձգտումը: Լիբերմանը Մուրսիին կոչ է արել խոսքը հաստատել գործողություններով:
Իսրայելա-եգիպտական հարաբերությունները սրվել են Կահիրեի կողմից Սինայի թերակղզում ռազմական գործողություններ սկսելու պատճառով: Դրա նպատակը ամսվա սկզբին 16 եգիպտացի սահմանապահների սպանություն կատարած գրոհայինների ոչնչացումն էր:
