Դանիայի պատմության մեջ առաջին անգամ այդ երկրի ակումբն իրավունք է ստացել մասնակցելու Չեմպիոնների լիգայի փլեյ օֆ փուլին: Սկանդինավյան ակումբի երկրպագուները դեռ խաղից մի քանի ժամ առաջ ամբողջությամբ իրենց թիմի գույներով էին զարդարել փոքրիկ մարզադաշտն ու անհամբեր սպասում էին պատմական իրադարձությանը:
Թիմերը խաղադաշտ դուրս եկան կանխատեսելի կազմերով: Պարզապես Անչելոտտին Անելկա-Դրոգբա զույգից նախապատվությունը տվել էր ֆրանսիացուն և, ինչպես հետագայում պարզվեց, չէր սխալվել: Սոլբակկենն իր հերթին Վինգաարդի փոխարեն նրա դիրքը վստահել էր Սանտինին:
Հանդիպման մեկնարկից «Չելսի»-ին տիրեց նախաձեռնությանն ու արդեն 10-րդ րոպեին երկու վտանգավոր գրոհ էր կազմակերպել. մի դեպքում Մալուդայի հարվածը լավ չստացվեց, մյուս դեպքում Տորրեսի արագությունը չբավարարեց գնդակին Վիլանդից շուտ հասնելու համար: Շուտով «ազնվականներ»-ի ակտիվությունը տվեց իր արդյունքը. 17-րդ րոպեին բազմափորձ Գրոնկյաերը կոպիտ սխալվեց, և նրա կատարած աննրբանկատ փոխանցումից հետո գնդակը հայտնվեց Անելկաի մոտ, որը սառնասրտորեն օգտվեց անսպասելի նվերից ու դիպուկ հարվածով բացեց հանդիպման հաշիվը: Ընդունած գոլից հետո դանիացիներն աշխուժացան և տիրեցին նախաձեռնությանը: Նրանց ցանկությունն ու նվիրվածությունն անզեն աչքով էր երևում, սակայն փոխանցումների խոտանը չափազանց շատ էր:
Առաջին խաղակեսում Անգլիայի չեմպիոնները ևս մի քանի անգամ կարող էին գրավել մրցակցի դարպասը, Անելկայի ու Տորրեսի հարվածներից հետո հրաշալի էր գործում Վիլանդը:
«Կոպենհագեն»-ը շատ ակտիվ սկսեց երկրորդ խաղակեսը: Մինչև 52-րդ րոպեն Պետեր Չեխը ստիպված եղավ դրսևորել իր ողջ վարպետությունը: Թվում էր, ուր որ է՝ տանտերերին կհաջողվի վերականգել հաշվի տարբերությունը, բայց տեղի ունեցավ ճիշտ հակառակը. 54-րդ րոպեին լոնդոնցիների հերթական հակագրոհն ավարտվեց գոլով: Լեմպարդը հանճարեղ փոխանցումով հարվածային դիրք դուրս բերեց Անելկալին, որը մեկ հպումով կրկնապատկեց հաշիվը: Մինչև խաղավարտ «Կոպենհագեն»-ին չհաջողվեց լրջորեն սպառնալ Չեխի պաշտպանած դարպասին, իսկ «Չելսի»-ն առանձնապես չէր էլ ձգտում նոր հաջողության հասնել. հաշիվն ամբողջությամբ բավարարում էր նրանց:
«Կոպենհագեն»-«Չելսի»` 0:2: «Չելսի»-ն ուսուցողական հանդիպում անցկացրեց, իսկ «Կոպենհագեն»-ի կարգը չբավականացրեց:
