Երեկ տեղի է ունեցել ԼՂՀ ԱԺ նիստը, որի ընթացքում ղարաբաղցի խորհրդարանականները հավանության են արժանացրել մի շարք օրինագծեր, որոնց մեծ մասն, ի դեպ, ներկայացված է ԼՂՀ կառավարության եւ ոչ թե ԼՂՀ ԱԺ պատգամավորների կողմից: Մասնավորապես, երեկ ղարաբաղցի օրենսդիրները քննել են «ԼՂՀ փրկարար ծառայության մասին» ԼՂՀ օրենքում լրացում եւ փոփոխություն կատարելու մասին օրենքի նախագիծը, «Թանկարժեք մետաղների մասին» ԼՂՀ օրենքում փոփոխություններ եւ լրացումներ կատարելու մասին, «Լիցենզավորման մասին»ԼՂՀ օրենքում լրացումներ և փոփոխություններ կատարելու մասին եւ «Պետական տուրքի մասին» ԼՂՀ օրենքում փոփոխություն և լրացում կատարելու մասին օրենքների նախագծերը: Ընդունվել է նաեւ «ԼՂՀ վարչատարածքային բաժանման մասին» ԼՂՀ օրենքում փոփոխություններ կատարելու մասին օրենքի նախագիծը, «Դատախազության մասին» ԼՂՀ օրենքում փոփոխություն կատարելու մասին», «ԼՂՀ դատական օրենսգրքում լրացում կատարելու մասին» եւ «ԼՂՀ օրենսդիր, գործադիր եւ դատական իշխանության մարմինների ղեկավար աշխատողների պաշտոնային դրույքաչափերի մասին» ԼՂՀ օրենքում փոփոխություն կատարելու մասին օրենքների նախագծերի փաթեթը: Այդ փոփոխություններով, մասնավորապես, նախատեսվում է բարձրացնել ԼՂՀ դատարանների դատավորների պաշտոնային դրույքաչափերը:
Փոփոխություններ են կատարվել նաեւ «Պետական կենսաթոշակների մասին» եւ «Զինծառայողների և նրանց ընտանիքների անդամների սոցիալական ապահովության մասին» ԼՂՀ օրենքներում: ԱԺ նիստի ավարտին հայտարարությամբ է հանդես եկել ԼՂՀ ԱԺ Դաշնակություն խմբակցության անդամ Վահան Բադասյանը`կապված Ղարաբաղում կապի ոլորտում միակ ընկերության` «Ղարաբաղ-Տելեկոմ»-ի սակագնային քաղաքականության հետ:
