Հարավային Կորեայում մոլեգնած հզոր «Բոլավեն» թայֆունը դարձել է 2 չինական ձկնորսական նավակի ջախջախման և 4 նավաստու մահվան պատճառ: Ներկայումս 11 ձկնորս համարվում է անհայտ կորած,- փոխանցում է Associated Press-ը:
Չնայած ուժեղ քամին և հեղեղը խանգարել են փրկարարների աշխատանքին` նրանց հաջողվել է փրկել 18 մարդու:
Սեուլում արտակարգ դրություն էր հայտարարվել այն բանից հետո, երբ թայֆունը 75 000 տուն առանց էլեկտրականության էր թողել:
Թայֆունի առաջացրած ջրհեղեղի և փոթորկի պատճառով մոտ 200 000 տուն մնացել է առանց էլեկտրականության, ավելի քան 50 մարդ զրկվել է տնից: Օդերևութաբանները զգուշացնում էին, որ «Բոլավենը» կդառնա վերջին տարիներին մոլեգնած ամենաուժեղ թայֆունը, սակայն այն ավելի թույլ հարվածեց, քան կանխատեսում էին մասնագետները:
Հավանաբար, օգոստոսի 28-ին թայֆունը կհասնի հարևան Հյուսիսային Կորեա, որը դեռ լիովին չի վերականգնվել երաշտից և դրան հաջորդած ջրհեղեղներից: Իշխանությունների տվյալներով` աղետի հետևանքով 100 000-ավոր տներ ավերվել էին, ավելի քան 170 մարդ մահացել էր:
