Այս գիշեր ՄԱԿ-ի Անվտանգության խորհուրդը դատապարտել է Լիբիայի ղեկավար Մուամար Քադաֆիի գործողությունները և պահանջել անհապաղ դադարեցնել բռնությունները: Այս մասին հաղորդում է Associated Press գործակալությունը:
Անվտանգության խորհրդի բոլոր 15 անդամները միաձայն ընդունել են համատեղ հայտարարություն, որով մտահոգություն են հայտնել Լիբիայում տեղի ունեցող իրադարձությունների կապակցությամբ` դատապարտելով ընդդեմ խաղաղ բնակչության կիրառվող ուժը: Խորհրդի անդամները կոչ են արել Լիբիայի կառավարությանը պաշտպանել սեփական ժողովրդին, հարգել մարդու իրավունքները, ինչպես նաև միջազգային իրավունքը:
Այսօր Պերուն խզել է իր հարաբերությունները Լիբիայի հետ: Այս մասին հայտարարել է Պերուի նախագահ Ալան Գարսիան: Նա նշել է, որ այս որոշումն ուժի մեջ է մնալու, քանի դեռ Լիբիայի իշխանությունները չեն դադարեցրել սեփական ժողովրդի դեմ բռնությունները: Այս մասին հաղորդում է BBC-ն:
Կրկին դատապարտող հայտարարություններով են հանդես եկել Սպիտակ տունը, ՆԱՏՕ-ի գլխավոր քարտուղարը, Գերմանիայի կանցլերը, Ֆրանսիայի նախագահը: