Միացյալ Նահանգների պետքարտուղարության ներկայացուցիչ Ֆիլիպ Քրոուլին երեկ արձագանքել է Աստրախանում հոկտեմբերի 27-ին ընդունված եռակողմ հռչակագրին: Նա հայտարարել է, որ ԱՄՆ-ը գնահատում է Ռուսաստանի ջանքերը Լեռնային Ղարաբաղի հարցի կարգավորման ուղղությամբ: Քրոուլիի խոսքով, Ռուսաստանի, Հայաստանի եւ Ադրբեջանի նախագահների` Աստրախանում հոկտեմբերի 27-ի հանդիպման արդյունքում ստորագրված համատեղ հայտարարությունը «դրական առաջընթաց է շարունակվող բանակցային գործընթացի շրջանակներում, որի նպատակը Լեռնային Ղարաբաղի հակամարտության խաղաղ կարգավորումն է»: «Մենք հուսով ենք, որ ձեռբ բերված համաձայնությունները կիրականացվեն ամենակարճ ժամկետներում», – ասել է պետքարտուղարության ներկայացուցիչը: Նախօրեին էլ պաշտոնական Փարիզն է ողջունել Ռուսաստանի, Հայաստանի եւ Ադրբեջանի նախագահներ Դմիտրի Մեդվեդեւի, Սերժ Սարգսյանի եւ Իլհամ Ալիեւի համատեղ հայտարարությունը: «Աստրախանյան համաձայնությունները կարող են նպաստել վերջին շրջանում հաճախացած` հրադադարի ռեժիմի խախտման դեպքերի նվազեցմանը», – ասված է ԵԱՀԿ-ի Մինսկի խմբում համանախագահող երկրի Ֆրանսիայի արտգործնախարարության տարածած հաղորդագրությունում: «Լեռնային Ղարաբաղի խնդիրը կարող է լուծվել միայն երկխոսության, Հայաստանի եւ Ադրբեջանի, նաեւ տարածաշրջանի բարգավաճման միջոցով»:
