Նյու Յորք քաղաքը ռեփեր Լիլ Ուեյնից պահանջել է ներողություն խնդրել,- հայտնում է Consequence of Sound կայքը:
Վերջերս MTV հեռուստաընկերությանը տված հարցազրույցում ռեփերը հայտարարել է, որ իրեն դուր չի գալիս Նյու Յորքը: Լիլ Ուեյնի այս արտահայտությունը հարուցել է Նյու Յորքի սենատոր Մալկոլմ Սմիթի, երիտասարդական հիփ-հոփ խորհրդի անդամների և զբոսաշրջային կազմակերպությունների ներկայացուցիչների դժգոհությունը:
«Ռեփերը հրապարակայնորեն հայտարարեց, որ իրեն դուր չի գալիս Նյու Յորքը: Միևնույն ժամանակ այս քաղաքը հիփ-հոփ շարժման օրրանն է: Միլիոնավոր նյույորքցիներ ամեն օր լսում են այդ երաժշտությունը»,- ասվում է վիրավորված կողմի հայտարարության մեջ:
2007-ի հուլիսին ռեփերը ձերբակալվել էր Նյու Յորքում համերգից հետո: Ոստիկանները նկատել էին, որ նա մարիխուանա է ծխում հյուրախաղերի ավտոբուսի մոտ: Ավելի ուշ Ուեյնի մոտ հայտնաբերվել էր նրա մենեջերի անունով գրանցված զենք: 2010-ի մարտին Լիլ Ուեյնը դատապարտվել է մեկ տարի ազատազրկման: Նա պատիժը կրել է նյույորքյան բանտում և ազատ է արձակվել 8 ամիս անց: Հավանաբար, խնդիրները, որոնց ռեփերը բախվել է Նյու Յորքում, նրան ստիպել են խոստովանել, որ չի սիրում այդ քաղաքը:
Լիլ Ուեյնի Tha Carter IV ձայնասկավառակը ներկայումս իններորդն է ու առայժմ վերջինը: Այն վաճառքի է հանվել 2011-ի օգոստոսին: Աշխատանքը բարձրացել է Billboard 200-ի առաջին հորիզոնական: Հաջորդ` I Am Not a Human Being II ալբոմը, կատարողը պատրաստվում է թողարկել 2012-ի աշնանը:
