ԱԺ «Ժառանգություն» խմբակցության պատգամավոր Զարուհի Փոստանջյանի եղբոր` Տիգրան Փոստանջյանի նկատմամբ հարուցված քրեական գործը խմբակցության քարտուղար Լարիսա Ալավերդյանը որակեց որպես Զարուհի Փոստանջյանի ակտիվ գործունեության դեմ ուղղված քայլ:
«Դա մի նոր արշավի սկիզբ է, որտեղ թիրախ են դառնում քաղաքական դաշտում ակտիվ գործունեության ծավալող անձինք»,- լրագրողների հետ հանդիպման ժամանակ նշեց Ալավերդյանը:
Նրա խոսքերով, այս ամենը ուժեղ կողմի նկատմամբ թույլ կողմի իրականացրած հետապնդումների սկիզբն է: Ալավերդյանը սպասելի համարեց այս հանգամանքը և նշեց, որ կոալիցիայի միավորվածությանը պետք է հետևեր արշավը ընդդիմադիր դաշտի նկատմամբ: Սակայն, նրա կարծիքով, քաղաքացիական հասարակությունը Հայաստանում գնալով ուժեղանում է, և իրենք կարողանալու են համարժեք պատասխան տալ այս իշխանություններին: