«Մարդկանց չի արգելվում զբաղվել առևտրով, պարզապես դա պետք է անել համապատասխան վայրերում, այլ ոչ թե փողոցում: Փողոցային առևտուրը արգելվում է, որովհետև դա հասարակական, պետական պահանջ է»,- լրագրողների հետ հանդիպման ժամանակ ասաց առևտրի սպասարկման վարչության գլխավոր մասնագետ Հովհաննես Ղալեչյանը:
Ղալեչյանի հաշվարկներով, այս պահին փողոցային առևտրի արգելման արդյունքում անգործ է մնացել 2500 մարդ: Նրա խոսքով` առևտուրը փողոցում արգելվեց հիմա, որովհետև այս պահին ամենաթեթև առևտրի սեզոնն է:
«Բոլոր քաղաքապետները խոստանում են, որ կվերացնեն փողոցային առևտուրը, սակայն այդպես էլ չեն անում: Քաղաքը մերն է, ոչ թե քաղաքապետի ու ավագանու սեփականությունը։ Այսուհանդերձ, պետք է նրանց նաև համապատասխան պայմաններ տալ աշխատելու համար: Նրանք էլ ընտանիք են պահում»,-ասաց «Սպառողների ասոցացիայի» նախագահ Արմեն Պողոսյանը:
Քաղաքապետարանի վարչությանը հանձնարարվել է նախագծել առևտրի կենտրոններ, որոնք կներկայացվեն քաղաքապետարան:
Վարչության գլխավոր մասնագետի խոսքով` մոտ 6 ամիս անց նոր առևտրի կենտրոնները պատրաստ կլինեն:
«Մինչ այժմ ներկայացվել է 9 առևտրային կենտրոնի առաջարկ: Մինչ այդ առևտուր կարող են անել Մաշտոցի, Կոմիտասի շուկաներում, որոնք հիմա միայն 10%-ով են զբաղեցված»,- խորհուրդ է տալիս Ղալեչյանը:
«Մենք, իհարկե, չենք կարող թելադրել շուկայի սեփականատիրոջը գին սահմանել տաղավարների համար: Ուստի՝ գները կբարձրանան, թե ոչ` մեր իրավասության տակ չէ: Բայց կարծում եմ` առևտրային տաղավարների վարձերի հնարավոր բարձրացումը քաղաքապետարանը անուղղակի կերպով կմեղմի»,- հույս հայտնեց Ղալեչյանը: