Բաց հասարակության ինստիտուտի օժանդակության հիմնադրամի հայաստանյան մասնաճյուղի դրամաշնորհային ծրագրով Կապանի «Սոսի» հեռուստաընկերությունը ամեն ուրբաթ ուղիղ եթերում «Մենք մեր մասին» հաղորդաշարով քննարկում է մարդու իրավունքներին առնչվող հարցեր:
Այս անգամ թեման սպառողների իրավունքներն ու ժամկետանց ապրանքներն էին: Անկախ փորձագետից բացի, հաղորդաշարին պետք է մասնակցեին ՀՀ գյուղատնտեսության նախարարության սննդամթերքի անվտանգության ու անասնաբուժության պետական տեսչության Սյունիքի մարզային կենտրոնի պաշտոնյաները:
Ըստ հեռուստաընկերության պատասխանատուների` պաշտոնյաները նախ ասացին, որ իրենց մոտ կառուցվածքային փոփոխություններ են կատարվում, ու դեռ պարզ չէ՝ ով ինչով է զբաղվելու։ Իրենց անհրաժեշտ է վերադասի թույլտվությունը։ Գործող կարգի համաձայն` դիմում են գյուղատնտեսության նախարարության հասարակայնության հետ կապերի բաժնի պետ Վահագն Մարտիրոսյանին և ստանում նախարարության թույլտվությունը:
Սննդամթերքի անվտանգության ու անասնաբուժության պետական տեսչության Սյունիքի մարզային կենտրոնի պետ Էդգար Թոխսանցը կարծես որևէ խնդիր չուներ։ Նա հանձնարարեց սննդամթերքի անվտանգության բաժնի պետ Արշակ Ղուկասյանին մասնակցել հաղորդաշարին։ Վերջինս էլ հաստատեց, որ կամ ինքն է մասնակցելու, կամ բաժնի պետ Գարիկ Միրզոյանը: Սակայն վերջին պահին, Արշակ Ղուկասյանը տեղեկացրել է, որ զբաղվածության պատճառով չի կարող մասնակցել հաղորդաշարին, իսկ Գարիկ Միրզոյանին պետք է միայն հանձնարարի մարզային կենտրոնի պետը։ Արշակ Ղուկասյանը, սակայն, չէր գտնում Էդգար Թոխսանցին, քանի որ վերջինիս հեռախոսն անհասանելի էր։
«Սոսի» հեռուստաընկերությունից նորից ահազանգեցին գյուղնախարարություն, ու թերևս հարցը գյուղնախարարի ուշադրության կենտրոնում հայտնվի:
Ինչ վերաբերում է կառուցվածքային փոփոխություններին, ապա կառավարության 2010թ.-ի դեկտեմբերի 30-ի համապատասխան որոշմամբ ստեղծվել է «Սննդամթերքի անվտանգության պետական ծառայության աշխատակազմ» կառավարչական հիմնարկը։ Բայց մինչ նոր կառույցի վերջնական ձևավորումը, գործող բոլոր բաժինները կատարում են իրենց գործառույթները, ինչի համար էլ պետբյուջեից աշխատավարձ են ստանում։
«Նման պարագայում անհասկանալի է մնում սննդամթերքի անվտանգության ու անասնաբուժության պետական տեսչության Սյունիքի մարզային կենտրոնի քաղծառայող ու ոչ քաղծառայող աշխատակիցների պահվածքը»,- ասված է հեռուստաընկերությամբ եթեր հեռարձակված տեսանյութում։