Եվրոպական ներդրումային բանկը Հայաստանին 30,316 մլն եվրո վարկ կտրամադրի երեք սահմանային անցակետերի` Բագրատաշենի, Բավրայի և Գոգավանի վերականգնման համար: Համաձայնագիրը ստորագրել է Հայաստանի ֆինանսների նախարար Վաչե Գաբրիելյանը և ԵՆԲ-ի Արևելյան քաղաքականության և Կենտրոնական Ասիայի բաժնի ղեկավար Հեյնս Օլբերսը:
«Ժամանակակից կդարձվի ամբողջ համակարգը՝ քաղաքացիների և բեռների անցումը սահմանով հեշտացնելու նպատակով: Ընդ որում, այդ ամենն արվելու է Համաշխարհային առևտրական կազմակերպության չափանիշներին համապատասխան»,- ասել է Գաբրիելյանը համաձայնագիրը ստորագրելուց հետո:
Նա տեղեկացրել է, որ այդ երեք անցակետերի վերականգնման համար, բացի ԵՆԲ-ից, վարկեր կտրամադրեն Վերականգնման և զարգացման եվրոպական բանկը` 10,3 մլն եվրո, Հարևանության ներդրումային գործակալությունը` 12 մլն եվրո, ինչպես նաև ԵՄ-ն գրանտ կառանձնացնի 3,31 մլն եվրոյի չափով, իսկ UNDP-ը կաջակցի 0,8 մլն եվրոյով:
Գաբրիելյանի խոսքերով` ծրագրի իրականացնողը կլինի UNDP-ն:
Եվրոպական ներդրումային բանկի վարկի մարման ժամկետը 25 տարի է:
Ավելի վաղ Հայաստանի ֆինանսների փոխնախարար Վարդան Արամյանը հաղորդել էր, որ ընդհանուր առմամբ երեք անցակետերը ժամանակակից դարձնելու համար անհրաժեշտ կլինի 60 մլն եվրո:
Հայաստանի վարչապետ Տիգրան Սարգսյանը ավելի վաղ հաղորդել էր, որ անցակետերի վերակառուցման նախագծերը պատրաստ են և դրանց ստեղծմանն աջակցել է
ԵՄ-ն:
Վարչապետի խոսքերով` համաձայն միջազգային պահանջներին, այդ անցակետերում կտրամադրվեն մաքսային ամբողջական ծառայություններ:
Երեք անցակետերից ամենակարևորը Բագրատաշենն է: 2010թ-ի ընթացքում դրանով Հայաստան է եկել 419 հզ ուղևոր և 134 տոննա բեռ, դուրս է եկել 420 հզ մարդ և 124 տոննա բեռ:
