«Իշխանությունն ունի օլիգարխներ, որոնք անում են՝ ինչ ուզում են, ունի ոստիկանական համակարգ, բանակ, քրեական տարրեր, և եթե իրենց մնա, ոչ մի բան փոխելու կարիք չի էլ առաջանա»,- ներկա քաղաքական իրավիճակին անդրադառնալով՝ կարծիք հայտնեց վերլուծաբան Արծրուն Պեպանյանը:
Պեպանյանի գնահատմամբ, հանրությունը պետք է փորձի կազմակերպվել:
Հրապարակախոս Տիգրան Պասկևիչյանն էլ նշեց, որ ինքը համաձայն չէ այն տեսակետի հետ, թե ընդդիմությունը թմբիրի մեջ է, կամ էլ չկա հասարակական պահանջ. «Եթե մի երեք տարի առաջ ներկայիս ձևով ընդդիմադիր դաշտում հայտնված լիներ Տիգրան Կարապետյանը, ապա նրան կհաջողվեր բավականին լուրջ շարժում արձանագրել: Ես չեմ փորձում գերագնահատել Լևոն Տեր-Պետրոսյանի շարժումը, բայց այս տարիների ընթացքում հասարակական միտքը առաջընթաց է ապրել, և այսօր հիմար բաներ ասելով՝ հասարակությանը չես կարող տանել քո հետևից»:
Պասկևիչյանի գնահատմամբ, եթե իշխանությունների առաջ 7 օր ես դնում և ասում, թե՝ եթե թոշակները չբարձրացնես, ես քեզ կասեմ՝ վերջ, ընդամենը հայտնվում ես ծաղրածուի վիճակում. «Այս տեսակ խոսակցություններ ժամանակին վարում էին Արտաշես Գեղամյանն ու մյուսները և հաջողում էին, բայց այսօր ժողովուրդը նման խոսքերին չի հավատում: Դրա պատճառներից մեկն էլ այն է, որ այս երեք տարիների ընթացքում ՀԱԿ-ը չի վարել պոպուլիստական քաղաքականություն: Լևոն Տեր-Պետրոսյանը, ինքը չլինելով պոպուլիստ, արմատախիլ արեց պոպուլիզմը այս դաշտից»:
Պեպանյանն էլ նշեց, որ իշխանափոխությունը մի շարք մարդկանց ֆիզիկական, տնտեսական մահ է նշանակում, և ընդդիմությունը պետք է հաշվարկի իր ռեսուրսները, որպեսզի կարողանա դուրս գալ ավտոմատների դեմ:
«Պետք է ազգը մեծապես մոբիլիզացնենք, ազգին ոտքի հանենք և գնանք ջարդենք իշխանություններին, բայց պետք է նաև մտածենք ու հասկանանք, թե ինչու է մեր իշխանավորն այդ տեսակ, և արդյոք հնարավոր է այլ կերպ նրանց հաղթել»,- նշեց Պեպանյանը և հավելեց, որ ինքը, շատ բաներ չընդունելով, այսօր էլ գնալու է հանրահավաքի:
