Տավուշի մարզի Այգեձոր գյուղի Ծիլի լիճն ընկած Էդգար Աթաբեկյանի մարմինը հայտնաբերվել է այսօր` ժամը 15.20: Այս մասին «Առաջին լրատվական»-ի հետ զրույցում տեղեկացրեց Տավուշի մարզային փրկարարական վարչության պետ, փոխգնդապետ Վաղինակ Հովսեփյանը: Մանրամասնելով` նշեց, որ հայտնաբերվածը Այգեձոր գյուղի բնակիչ, 1969 թվականին ծնված Էդգար Աթաբեկյանն է, ով, ըստ նախնական տեղեկությունների, Ծիլի լճափին վարդավառ տոնելիս հայտնվել է ջրում և խեղդվել: Վաղինակ Հովսեփյանի վստահեցմամբ` ջրահեղձման դեպք է եղել: Նրա խոսքով` այս պահին ավել մանրամասներ հայտնի չեն:
«Առաջին լրատվական»-ի հավաստի տեղեկություններով` Էդգար Աթաբեկյանը երեկ ընտանիքի հետ իսկապես Վարդավառ է տոնել Ծիլի ափին, սակայն, լճում լողալիս, ինքնազգացողությունը վատացել է, փրկության է հասել որդին, սակայն ապարդյուն. չի կարողացել ջրից դուրս բերել: Ականատեսները, դիակը ջրից դուրս հանելիս, նկատել են, որ Էդգար Աթաբեկյանի ձեռքը եղել է սրտի վրա: Ըստ նախնական վարկածների` իրականում, Էդգար Աթաբեկյանի մոտ սրտանոթային համակարգի խնդիր է առաջացել ջրում:
