Սեպտեմբերին Էջմիածնում կայանալիք քաղաքապետի ընտրություններին, թեև ըստ տեղեկությունների՝ մտադրվել էր իր թեկնածությունն առաջադրել նաև նախկին պատգամավոր Հակոբ Հակոբյանը (Ճոյտ), սակայն վերջինս որոշել է հետ կանգնել այդ որոշումից: «Առաջին լրատվական»-ը փորձեց պարզել, թե ի՞նչն է Հակոբ Հակոբյանի այս որոշման պատճառը:
– Պարոն Հակոբյան, դուք հիմա մտադի՞ր եք առաջադրվել, թե՞ ոչ:
– Ո՛չ, մտադիր չեմ առաջադրվել:
– Իսկ ինչո՞ւ չեք առաջադրվում, անընդհատ տեղեկություններ են շրջանառվում, որ դուք ուզում եք Էջմիածնի քաղաքապետ դառնալ: Հիմա սա լավ հնարավորություն չէ՞ ձեզ համար:
– Հիմա անձնական գործեր ունեմ, գործերս ավելի շատ են, ֆիզիկապես չեմ կարող հասցնել, որ նա էլ անեմ, նա էլ:
– Ավելի շատ բիզնեսո՞վ եք զբաղված հիմա:
– Այո՛, բիզնեսով եմ զբաղված:
– Իսկ մտադի՞ր եք հետագայում քաղաքապետ դառնալ:
– Ո՛չ, քաղաքապետի մասին ես չեմ մտածում:
– Բայց միշտ համառորեն լուրեր են շրջանառվել, որ դուք ցանկացել եք դառնալ քաղաքապետ:
– Դե գիտեք, մարդիկ խոսում են, ասում են, ամեն մեկը մի ձևի արտահայտվում ա: Բայց ամենակարևորը մարդու ցանկությունն ա: Եթե ես քաղաքապետ սրտանց չեմ ուզում աշխատեմ, ո՞նց աշխատեմ: Ես իմ վերադաս մարդկանց հետ միշտ շատ դժվար եմ աշխատել: Ժողովրդի կողմից ընտրված պատգամավորը որևիցե վերադաս չունի: Իսկ դուք պատկերացրեք՝ ես ընտրվեմ քաղաքապետ, մարզպետը պտի կանչի, կառավարությունը կանչի, մյուս-մյուս: Ես դրանց հետ էդքան յոլա էթացող մարդկանցից չեմ:
– Այսինքն` չե՞ք ենթարկվի կառավարությանը:
– Այո, այո, չեմ ենթարկվի: Ես սիրում եմ, որ ինքս ինձ ղեկավարեմ: Էդ ձև եմ ես սովոր, բայց սովոր չեմ, որ գրություններ ստանաս, հետո ուզես, թե չուզես պտի կատարես էդ որոշումները, տարբեր հանիպումներ, մարզպետարանում խորհուրդներ և այլն, և այլն: Հիմա որ ընտրվեմ, հետագայում բոյկոտեմ, ի՞նչ կդառնա, վնաս կլինի քաղաքին: Ես կարծում եմ, որ ընտրված քաղաքապետը չի ենթարկվում նշանակովի մարզպետին: Մարզպետն ինքն էլ իրավունք չունի ընտրված համայնքապետին կանչի: Ես բազմիցս ասել եմ, հիմա էլ նույն բանն եմ ասում՝ ես չեմ կարա ինչ-որ մեկին ենթարկվեմ: Համայնքի ղեկավարն ավագանու որոշումներն ա կատարում և հաշվետու ա ժողովրդին: Այլ հեղինակություն նա չունի: Այ այս բաներն են ինձ պահում, որ ես չեմ ուզում ընտրվեմ և դրանով վնաս պատճառեմ իմ ժողովրդին:
– Խոսակցություններ կան, որ Էջմիածնում գեներալ Մանվելի կողմնակիցներն ահաբեկում են մյուս թեկնածուներին, որպեսզի ոչ ոք թեկնածություն չառաջադրի և քաղաքապետ վերընտրվի Կարեն Գրիգորյանը: Դա կապ ունի՞ ձեր չառաջադրվելու հետ:
– Ես այդպիսի բաներ չեմ տեսնում, որ նրանք ահաբեկեն: Պարզապես մարդիկ չեն առաջադրում իրանց թեկնածությունը: Միգուցե նախկինում եղել են նման բաներ: Բայց էսօրվա վիճակով էդպիսի լուրեր չեմ ստացել, որ որևիցե մեկին ահաբեկեն, որևիցե մեկն ուզենա դնի, նրան չթողեն: Ես էդպիսի բաներ չեմ լսել: Նախկինում մամուլից, տարբեր առիթներով ես կարդացել եմ, որ ինչ-որ ահաբեկել են և այլն, և այլն: Բայց եթե ահաբեկում կա, թող գնան, իրավապահ մարմիններին հայտարարություն տան, եթե դա իրականությանը մոտ ա կանգնած: Բայց որպես քաղաքում ապրող տղա՝ ես չեմ տեսել, որ գնան, ինչ-որ մեկին ահաբեկեն, թե՝ դու պտի չդնես, եթե դնես, պրոբլեմ կունենաս: Ես համենայնդեպս չեմ լսել: Եթե այդպես լինի, ես առաջինը կքննադատեմ էդ ամեն ինչը, բարձրաձայն կասեմ, կքննադատեմ իրենց, պարզապես չեմ տեսել:
– Ի՞նչ խնդիրներ կան, ըստ Ձեզ, Էջմիածնում, որ հրատապ լուծման կարիք ունեն: Չէի՞ք ուզի խնդիրների լուծմանը մասնակցել:
– Ես ավելի շատ իմ անձնական գործերով եմ զբաղված, չէի ուզենա, որ իմ ժամանակը տրամադրեի դրան: Ինչ վերաբերում ա խնդիրներին, խնդիրներ շատ կան: Ես կուզենայի, որ ավելի շատ քաղաքապետարանն աշխատեր թափանցիկ, ավելի պարզ, որպեսզի հասարակության աչքի առաջ լիներ ամեն ինչը: Հասարակությունը պիտի տեսնի, չքննադատի, չբամբասի: Եթե հասարակության համար տեսանելի չի, նա սկսում ա բամբասել, իրա կարծիքը հայտնել, որը ցանկալի չի:
– Հիմա ամեն ինչ պարզ ու թափանցիկ չի՞ Էջմիածնում:
– Ոչ, հիմա այդպես չի, հիմա թափանցիկ չի: Եվ ես կուզենայի, որ ավագանու ինստիտուտը կայանար Էջմիածնում: Ավագանու ինստիտուտը նույնպես շատ կարևոր ա, որ ավագանին վերահսկողություն սահմանի համայնքի բյուջեի նկատմամբ, գործերի նկատմամբ, կլինի բազմակարծություն, և կարծում եմ՝ ավելի հեշտ կաշխատեն: Ես կուզենայի, որ գոնե ավագանիները լինեին անկախ, որոնք կախվածություն չէին ունենա համայնքապետից: Երբ որ տարաձայնություններ են լինում ու ժողովուրդը նույնպես մասնակցում ա դրանց, շատ լավ ա: Բայց սենց սուս ու փուս ամեն ինչ անցկացնելը շատ վատ ա: Ավագանին կզգաստացնի քաղաքապետին, դա հենց դրա համար ա ստեղծված, որ իրա վերահսկողությամբ կարողանա այնպես անի, որ համայնքապետը ավելի լավ աշխատի, ավելի ճիշտ աշխատի:
– Ասում եք՝ չեք սիրում ենթարկվել վերնախավին: Պատգամավոր եղած ժամանակ ավելի ազա՞տ էիք:
– Պատգամավոր եղած ժամանակ իմ անուն-ազգանունի դեմը գրվում էր՝ անկառավարելի: Պատգամավորը պետք է աշխատի իրա խղճի առաջ, ես էլ այ էդ ձև եմ աշխատել:
– Այսինքն՝ ՀՀԿ վերնախավի՞ն էլ չեք ենթարկվել:
– Ես ենթարկվել եմ իմ խղճին և համոզմունքներին: Սահմանադրությունը չի ասում, որ դու պետք է ա ենթարկվես վերնախավին: Էդ ձևի տող չկա: Օրենքն ասում ա, որ պատգամավորը պետք ա աշխատի իրա խղճի և համոզմունքների համաձայն: Դե եթե ես էդքան շատ վերնախավին ենթարկվեի, ես էլ էսօր պատգամավոր կլինեի:
