Հայաստանում անտառահատումների հիմնական պատճառն այն անհատ գործարարներն են, որոնք փայտ են արտահանում Հայաստանից, նաև այն անհատ գործարարները, որոնք փայտ են վաճառում Հայաստանում, և իհարկե` այն անհատները, որոնք ծառ են հատում վաճառքի համար:
Այս մասին են վկայում «Էկո-Հայաստան» դաշինքի «Փրկենք մեր անտառները» արշավի շրջանակում Հայաստանի ամբողջ տարածքում իրականացված «Անտառահատումների և անտառների պահպանության նկատմամբ վերաբերմունքը Հայաստանում» համազգային հարցման արդյունքները:
Հարցման արդյունքների համաձայն` Հայաստանի տասը քաղաքների բնակիչներից ինը հետաքրքրված են Հայաստանում անտառների պահպանությամբ, և միայն չորսն են առնվազն որոշ չափով բավարարված Հայաստանում անտառների պահպանությամբ:
ՀՀ գրեթե բոլոր քաղաքացիները կարծում են, որ անտառները կարևոր են բույսերի և կենդանիների բազմազանությունը երկարաժամկետ պահպանելու, հասարակությանը պաշտպանելու այնպիսի բացասական ազդեցություններից, ինչպիսիք են անապատացումը, հողի էրոզիան և ջրհեղեղները, ու հանգստի և ժամանցի համար նախատեսված վայրեր ունենալու համար:
Տասը քաղաքացիներից ութը նշել են, որ անտառները կարևոր են փայտի պաշարը երկարաժամկետ ապահովելու համար, ինը մտահոգված են, որ իրենց երեխաներն ապրելու են ավելի վատ շրջակա միջավայրում, քան իրենք հիմա:
Հարցման արդյունքները վկայեցին, որ անտառամերձ շրջանների բնակիչները անտառապահպանությունը պատկերացնում են միայն գազի հասանելի դառնալու դեպքում: Տասը քաղաքներից 9-ը կարծում են, որ «եթե աղքատությունը նվազեր, ապա կնվազեր նաև վառելափայտի համար անտառի ապօրինի օգտագործումը»: Ի դեպ, Հայաստանի քաղաքացիների մոտ երկու երրորդը կարծում է, որ Հայաստանում անտառների վիճակը վատացել է վերջին հինգ տարիների ընթացքում: